Ish-kryeprokurori Adriatik Llalla ka dështuar totalisht gjatë drejtimit të Prokurorisë së Përgjithshme përgjatë vitit 2017. Ministrja e Drejtësisë, Etilda Gjonaj e akuzoi dje ish-kryeprokurorin se nuk ka kryer asnjë hetim pavarësisht ankesave të shumta që ministria ka depozituar në prokurori. Gjatë raportimit në Komisionin e Ligjeve mbi mënyrën e zbatimit nga organi i Prokurorisë ndaj rekomandimeve prioritare të dhëna nga Këshilli i Ministrave në luftën kundër kriminalitetit gjatë vitit 2017, ministrja Gjonaj u shpreh se në 80 ankesa që Ministria e Drejtësisë ka bërë në prokurori, organi i akuzës nuk ka ndërmarrë asnjë hetim ndaj të akuzuarve. “Ministria e Drejtësisë ka depozituar 80 ankesa në prokurori, por gjatë 2017 organi i akuzës nuk ka ndërmarrë asnjë hetim në lidhje me këto çështje. Pra ka pasur një nivel të dobët sa i takon hetimeve proaktive. Prokuroria i ka pasur të gjitha mundësitë që të ndërmerrte hetime proaktive. Dhe kjo gjë ka sjellë një ngërç të madh në sistem”, tha Gjonaj. Por në kuadër të kësaj deklarate, ministrja Gjonaj deklaroi se ndaj të gjithë prokurorëve që nuk kanë marrë përsipër nisjen e hetimeve do të ketë penalitete. “Ish-Prokurori i Përgjithshëm nuk e konsideroi të rëndësishëm inspektimin në një kohë që ligji e thotë qartë që prokuroria dhe KLD kanë kompetenca, MD jo. Drejtoria e inspektimit duhet të vijonte, pasi solli ngërç të madh. Për hetimet pro aktive është situatë dramatike, pasi prokuroria ka pasur të gjitha mundësitë që të ndërmarrë hetime pro aktive. 0.33% e të numrit total, vetëm 1/3 ishte për çështjet e korrupsionit. Arsyeja do të thotë është se mungesë e ushtrimit të detyrës nga ana e prokurorëve. Pikërisht për ata prokuror që nuk kanë marrë hetime duhet të ketë penalitete”, u shpreh Gjonaj.
Gjonaj: Llalla krijoi vështirësi në procesin e vetingut
Ministrja Etilda Gjonaj lëshoi akuza dje ndaj ish-kryeprokurorit Adriatik Llalla edhe për procesin e vetingut. Gjonaj tha se Prokuroria e Përgjithshme gjatë vitit 2017 ka mbyllur për një vit e gjysmë Drejtorinë e Inspektimit, duke krijuar vështirësi reale për procesin e vetingut. Gjonaj tha se për shkak të shkrirjes së kësaj strukture nga tetori 2016 deri në shkurt 2018, është bërë i mundur rivlerësimi për vetëm 24 prokurorë. “Sipas ligjit 84 2016 përcaktohet si organ ndihmës të organeve të vettingut struktura përkatëse e Prokurorisë së Përgjithshme. Vlen të theksohet se kjo strukturë, Drejtoria e Inspektimit përgjatë 2016 nuk ka ekzistuar, duke krijuar një vështirësi dhe duke ndikuar negativisht dhe në procesin e vlerësimit profesional të prokurorëve. Kjo deri në shkurt të 2018 kur rezulton se në KPK, nga Prokuroria ishin dorëzuar raportet vetëm për 24 subjekte, duke sjellë vështirësi në procesin më të rëndësishëm në procesin e vetingut”, tha Gjonaj. Sakaq, ministrja u ndal edhe tek çështja e shumë debatuar gjatë ditëve të fundit, ajo e magjistarëve. Gjonaj tha se ndryshimet e propozuara duhet të miratohen pasi vetëm në këtë mënyrë Shkolla e Magjistraturës do të hap sesionin e ri akademik. “Nëse ky ndryshim ligjor nuk miratohet, atëherë është e pamundur që Shkolla e Magjistraturës të hapë vitin e ri akademik dhe e dyta ka të bëjë me kategorinë e kandidatëve për magjistratë që kanë mbaruar studimet këtë vit. Në konsideratat e mia, jo vetëm që është e ligjshme, por duhet patjetër kur gjyqtarë dhe prokurorë po na dalin nga sistemi ose duke dhënë dorëheqjen apo nuk kalojnë procesin e vetingut. Nga propozimet nuk ka asnjë risi, thjesht kërkohet të shtyhet periudha tranzitore e ligjit për t’u zbatuar dhe pritjen e ngritjes së institucioneve të reja”, u shpreh ministrja. /Endri Arizi
