Ish-juristi i OSHE, Romeo Kara e cilëson skandal kërkesën e prokurorisë për pushimin e hetimeve për CEZ. Si një ndër kallëzuesit për këtë aferë, Kara ka zbardhur skandalin që fshihet pas pushimit të hetimeve nga prokuroria. Në një prononcim për gazetën “SOT”, ish-juristi i OSHE deklaroi se prokuroria po mundohet t’i japë kohë ish-kryeministrit Sali Berisha për të asgjësuar të gjitha provat që e implikojnë në këtë aferë.
Sipas tij, Berisha është një nga të akuzuarit kryesor në aferën e CEZ, duke shtuar se prokurorisë i mjafton edhe vetëm kallëzimi i depozituar prej tij për të çuar deri në fund hetimet dhe për të çuar para drejtësisë të gjithë të implikuarit. “Nëse asnjë nga të kallëzuarit prej meje nuk paraqitet, prokurorisë i mjafton kallëzimi im për ta çuar çështjen në gjykatë dhe gjykatës i mjafton plotësisht ky kallëzim që ta zhvillojë gjykimin në mungesë të tyre. Një tregues real që fakton varësinë e prokurorisë nga Berisha është mosthirrja e tij për t’u pyetur prej saj edhe pse ai është i akuzuari kryesor prej meje dhe prej Kuvendit të Shqipërisë. Gjithashtu çdo veprim i prokurorisë po i shërben vetëm interesave të Berishës dhe vetëm atij. Prokuroria jo vetëm nuk po bën hetime, por ajo po i jep mundësi prej vitesh Berishës që ai me fuqinë dhe mundësinë që ka të cenoje integritetin e këtij procesi, të zhduke provat, të intimidojë bashkëpunëtoret e tij, ata që kanë dijeni etj”, tha Kara.
Arrestimi i Berishës
Më tej, ish-juristi i OSHE u shpreh se prokuroria është kthyer në një vegël qorre të Berishës, duke shtuar se nëse do të ishte kryer një hetim i plotë i pasurisë së ish-kryeministrit, ai do të ishte arrestuar më herët. “Duke qenë i akuzuar për korrupsion dhe shpërdorim detyre, prokuroria duhej të kishte hetuar çdo cent të pasurisë së Berishës dhe ta sekuestronte atë, por kjo gjë nuk ka ndodhur. Nuk po flas pastaj për arrestimin që ajo duhej t’i kishte bërë Berishës që në krye të herës. Realisht kjo prokurori është një avokate e Berishës, një vegël qorre dhe besnike e tij, si dhe një fatkeqësi për këtë popull dhe sigurinë juridike shqiptare. Dosja CEZ-DIA vjen në vazhdën e bëmave në sektorin energjetik, ku 460 milionë euro debi, do të mblidheshin nga vetë CEZ-i, do ti atribuoheshin kompanisë DIA dhe do të ndaheshin gjysma për palën ceke dhe gjysma për politikanët që fshiheshin pas kompanisë offshore DIA. Pra, 230 milionë euro, do të dilnin nga CEZ-i nëpërmjet një kontrate mashtrimi, për të mbushur xhepat e politikanëve si Meta, Berisha etj”, tha Kara.
Pushimi i çështjes
Ish-juristi i OSHE u shpreh se prokuroria nuk ka zbatuar kërkesën e gjykatës për të vijuar hetimet, por ka kërkuar sërish pushimin e çështjes. Në reagimin e tij për gazetën, Romeo Kara tha se prokuroria është bazuar vetëm tek një dëshmi e palës çeke. “Pas një argumentimi shterues prej dhjetëra faqesh, gjykata mori vendim në 15 dhjetor 2017 që çështja të kthehej për plotësim hetimi duke rekomanduar një hetim të plotë për këtë çështje përveç edhe disa detyrave specifike. Kanë kaluar mbi dy vjet dhe prokuroria vjen sërish në gjykatë me kërkesën për pushimin e çështjes edhe pse nuk ka bërë pothuaj asnjë hetim, jo më të flasim për një hetim të plotë siç la detyrë gjykata.
Prokuroria, sipas lajmit që keni dhënë edhe ju si gazetë, është mjaftuar me një përgjigje të thatë të ish-drejtuesve çek të CEZ-it, të cilët janë shprehur se nuk kanë ruajtur dokumentacionin në fjalë apo nuk mbajnë mend, si dhe konstatimin e mosgjetjes së Nuel Kalajt”, tha ish-juristi i OSHE Romeo Kara në reagimin e tij për gazetën. /Elisjeda Kiko
