Ndërkombëtarët janë vënë dje në lëvizje për të bllokuar planin Berisha-Meta për djegie mandatesh. Pas raportuesit për Shqipërinë, Knut Fleckenstein dhe zëdhënësja së Komisionit Europian, Maja Koçijançiç, ditën e djeshme kundër vendimit të opozitës ka dalë edhe ambasadori i BE në Tiranë, Luigi Soreca me ambasadën e SHBA. Të dyja këto institucione kanë qenë në unison, duke ja u bërë të qartë krerëve të opozitës që të tërhiqen nga plani i tyre.
Ambasada e SHBA u ka kërkuar deputetëve që të veprojnë individualisht dhe të mos dëgjojnë thirrjet e Berishës, Bashës, Metës apo Kryemadhit. Pra duket se kemi të njëjtin skenar si me reformën në drejtësi. Në 2016 PD po bënte gjithçka për të bllokuar ndryshimet kushtetuese, por Donald Lu nisi takimet me secilin deputet dhe madje u dërgoi mesazhe në celular duke i kërcënuar. Dje ambasadat e BE dhe SHBA dhanë sinjale se po kthehemi te i njëjti skenar. Nuk përjashtohet mundësia që amerikanët të zhvillojnë takime me deputetë të caktuar dhe t’i bindin të qëndrojnë në Parlament.
Pra duket qartë se deputetët e opozitës do përballen me pasoja nëse shkojnë te vendimi ekstrem. “Një demokraci e shëndetshme kërkon një opozitë që funksionon në mënyrë konstruktive brenda institucioneve kushtetuese. Kërcënimet nga PD, LSI dhe parti të tjera opozitare për të braktisur mandatet e tyre në parlament minojnë parimet bazë të demokracisë dhe sabotojnë përparimin e rëndësishëm që Shqipëria ka arritur në zbatimin e ligjit dhe qeverisjen e përgjegjshme.
Shtetet e Bashkuara iu bëjnë thirrje të gjithë deputetëve të ngrihen mbi sherret politike, të refuzojnë thirrjet për të braktisur mandatet e tyre dhe të mbrojnë idealet dhe parimet që janë me rëndësi thelbësore për çdo demokraci të fortë”, thuhet në njoftimin e ambasadës së SHBA në Tiranë.
Reagimi i BE
Në të njëjtën linjë ishte dhe ambasada e BE. Gjatë një prononcimi për mediat, Luigi Soreca iu bëri thirrje deputetëve të vendosin individualisht për mandatet dhe të mos ndjekin pas Bashën e Kryemadhin. Madje, ambasadori i Bashkimit Europian theksoi se heqja dorë e deputetëve të opozitës nga mandati tradhton besimin e qytetarëve. “Parlamenti është baza e çdo demokracie europiane.
Ai është vendi ku duhet të diskutohen dhe të çohen përpara debatet mbi reformat dhe zhvillimet përkatëse. Parlamenti nuk duhet bojkotuar. Dëgjuam njoftimin nga partitë opozitare, që deputetët individualë do të heqin dorë nga mandatet e tyre aktuale. Çdo deputeti individual i takon të vendosë vet se çfarë do të bëjë me përgjegjësinë që kanë marrë para votuesve të tyre, për të mbrojtur pozitat dhe interesat e tyre në Parlament. Kjo është detyra e tyre themelore. Është e qartë, megjithatë, se heqja dorë nga mandatet është dukshëm kundër produktive për Shqipërinë dhe shkon kundër interesave të qytetarëve për reforma.
93% e shqiptarëve dëshirojnë t’i bashkohen BE-së, që do të thotë se janë votues nga të gjitha krahët e Parlamentit”, deklaroi ai. Më tej, ambasadori i Bashkimit Europian në Tiranë, Luigi Soreca u ndal edhe tek sfidat që e presin vendin tonë, siç janë çelja e negociatave me BE dhe ngritja e SPAK dhe BHK. Në fjalën e tij, Soreca u shpreh se vendimi i opozitës do të ndikojë negativisht në imazhin e Shqipërisë në arenën ndërkombëtare si dhe në ecurinë e reformave. “Vendi është aktualisht i angazhuar në një rrugë të rëndësishme për reforma. Qershorin e ardhshëm, ai do të gjykohet nga progresi i bërë në këto reforma.
Pikë së pari, reforma në drejtësi, thelbi i të gjithë ringritjes së shoqërisë shqiptare. Këtu duhet të fokusohen të gjitha përpjekjet e shumicës dhe të opozitës. Për të ngritur të gjitha institucionet e reformës në drejtësi, e në veçanti SPAK-un dhe BKH-në. Ky objektiv i rëndësishëm duhet të udhëheqë vendimet e të gjitha partive politike. Bojkotimi i Parlamentit nuk shkon në këtë drejtim”, nënvizoi ambasadori Soreca./Rigels Seliman
