Partia Socialiste nuk është aspak e kënaqur me sjelljen e Presidentit të Republikës, Ilir Meta. Ky i fundit përgjatë këtyre ditëve ka sfiduar hapur qeverinë duke kthyer për rishqyrtim në Kuvend dy ligje: atë për teatrin dhe atë për uljen e TVSH për lojërat e fatit. Ndërkohë, nga ana tjetër, ai mban akoma peng dekretin për kreun e SHISH të propozuar nga kryeministri Edi Rama, Helidon Bendo.
Mirëpo për deputetët e Partisë Socialiste, një qëndrim i tillë i kreut të shtetit tregon se ai po bëhet palë me opozitën. Përfaqësuesi i PS në qarkun e Fierit, Bujar Çela deklaroi dje për gazetën “SOT” se Ilir Meta po ndjek lojën e Sali Berishës. Sipas tij, ai po tenton të bllokojë reformën në drejtësi, por e paralajmëroi se një gjë e tillë nuk do të ndodhë kurrsesi sepse në mes janë edhe ndërkombëtarët. “Ai tashmë e ka kuptuar që është një burrë shumë i vogël dhe mundohet të bëjë burrin e madh duke mos dekretuar atë që i dërgon mazhoranca.
Ai thjesht po shton afatet dhe vuajtjet e atyre që duan të punojnë, pengon sa mundet demokracinë e këtij vendi, emërimet, dekretimet, reformën në drejtësi. Ai mësimet i merr nga baba Saliu kështu që ai nuk ka ndryshuar asgjë.
Zakoni është ai i vjetri: bashkëpuno me Saliun sepse diçka do të mbetet. Kështu që historia e mosdekretimit të Helidon Bendos, është thjesht një vijim i ëndrrës së Sali Berishës dhe Visho Ajazit. Meta harron që këtë reformë në drejtësi e bëjnë ndërkombëtarët dhe nuk ka kthim mbrapa”, tha Bujar Çela. Ndërsa për deputetin e PS në Tiranë, Sadri Abazi, vendimi i Ilir Metës tregon qartë ndikimin e kryetares së LSI, Monika Kryemadhi. “Mua më vjen keq për zotin Meta, por unë besoj se ky është vendim i zonjës Monika.
Ky nuk është vendim Presidenti, por është vendim i kryetares së Lëvizjes Socialiste për Integrim. Nuk po e marrim vesh çfarë është”, theksoi Sadri Abazi. Ndërsa socialisti në Vlorë, Andrea Marto, disi më i rezervuar u shpreh se Kuvendi do t’i marrë vendimet në shtator. “Presidenti është duke ushtruar kompetencat e tij. Kuvendi do shprehet në shtator”, tha ai.
Reagimi i Erjon Braçes
Mjaft i irrituar me vendimin e Presidentit Ilir Meta për të kthyer ligjin për uljen e TVSH u shfaq dje edhe kryetari i Komisionit të Ekonomisë, Erjon Braçe. Përmes një postimi në rrjetet sociale, ai shpërtheu në akuza kundër kreut të shtetit, duke deklaruar se ky i fundit po bën propagandë.
Madje, Braçe shtoi se disa institucione nuk e marr seriozisht punën. “Më lejoni të them se, jam jo vetëm kundër jush, argumenteve tuaj, por jam i tmerruar nga propaganda, akoma më shumë nga e pavërteta! Por mbi të gjitha, nga një fakt që po e zhbën akoma edhe më shumë përmbajtjen e akteve për pasojë seriozitetin e disa prej institucioneve të këtij shteti: mungesa e të lexuarit.
Jo të shkrimeve të një “gagaçi mendor”, është dikush aty që i lexon këto. Por të dokumenteve zyrtare që duhet të jenë baza e argumenteve në një akt të fortë si Dekreti i Presidentit që kthen pas një ligj”, deklaroi Erjon Braçe. Sipas tij, nëse do ishin lexuar dokumentet, atëherë do të mësohej e vërteta. Për Braçen, e vërteta qëndron ndryshe nga ç’shprehet Meta, ndërsa rendit edhe shpjegimet e tij. “Në nenin 6 të ligjin që ju keni kthyer, ne kemi njësuar dispozitat e ligjit “Për tatimin mbi të ardhurat” me dispozitat e ligjit “Për lojërat e fatit”.
Asgjë më shumë! Zero! Ligji “Për lojërat e fatit”, me këto dispozita, është votuar në vitin 2015. Ju personalisht, LSI që ju drejtonit, keni votuar PRO! Unë kam qenë kundër jush”, tha Erjon Braçe.
Mimoza Ibra
