Gjykata e Lartë pritet që shumë shpejt të ketë 10 anëtarë. Pak ditë më parë KLGJ propozoi emërimin e gjyqtarit Artur Kalaja, ndërsa sot pritet të bëhet propozimi për Asim Vokshin.
KLGJ do të mblidhet në seancë plenare dhe do i propozohet presidentit emërimi i Asim Vokshit duke e çuar në 9 numrin e anëtarëve. Ndërkohë sipas njoftimit të KLGJ është mbyllur procesi i ngritjes në detyrë për Sokol Ibin.
“Shqyrtimi i projektvendimit “Për përfundimin e procedurës së ngritjes në detyrë në Gjykatën e Lartë, për pozicionin e lirë në fushën e të drejtës administrative, të shpallur me Vendimin nr. 83, datë 26.02.2020, për kandidatin z. Sokol Ibi”; Shqyrtimi i projektvendimit “Për propozimin për emërim në Gjykatën e Lartë, të kandidatit z. Asim Vokshi””, thuhet në rend dite.
Ndërkohë sipas burimeve punë ditësh është emërimi i Dariel Sinës, i cili do e çojë në 10 numrin e anëtarëve të Gjykatës së Lartë. Me plotësimin e Gjykatës së Lartë me 10 emra nis puna për të plotësuar Kushtetuesen me 9 anëtarë.
Loja me Kushtetuesen
Sipas ligjit, Kushtetuesja përbëhet nga 9 anëtarë, ku 3 i zgjedh Kuvendi, 3 presidenti dhe 3 Gjykata e Lartë. 2 institucionet e para e kanë përmbushur detyrimin, por Gjykata e Lartë ende. Arsyeja është sepse nuk ka kuorumin për të thirrur mbledhjen e gjyqtarëve.
Sipas ndryshimeve të fundit, Gjykata e Lartë duhet të ketë së paku 10 anëtarë që të hedhë në votim emrat që do shkojnë në Kushtetuese. Aktualisht janë 9 kandidatë që kanë shfaqur interes. Emrat i ka marrë në dorë KED, e cila ka nisur verifikimet. Nga ana tjetër KLGJ po punon paralelisht për të çuar në 10 numrin në Gjykatën e Lartë.
Sinjalet janë se në shtator Gjykata e Lartë do ketë 10 emra dhe do përzgjedhë lehtësisht 3 emrat e Kushtetueses. Por kjo do të thotë se shtohen telashet për presidentin. Meta momentalisht ka disa anëtarë të Kushtetueses besnikë të tij. Por në momentin që do shkojnë 3 anëtarët nga Gjykata e Lartë balancat do ndryshojnë dhe shanset për shkarkimin e tij shtohen.
Përshpejtimi i procedurave
Zakonisht jemi mësuar që në KED të ketë betejë të fortë për kandidaturat, por këtë herë duket se do jetë ndryshe. Anëtarët duken tepër të vendosur për të çuar para këtë proces. Vetë KED ka dalë me një njoftim, ku iu bën thirrje institucioneve dhe qytetarëve që nëse kanë të dhëna dhe dokumente për 9 kandidatët në fjalë, t’i dërgojnë pranë institucionit.
KED ka kërkuar bashkëpunim nga të gjithë për të mbyllur sa më shpejt verifikimet. “Prandaj ky këshill është tërësisht i angazhuar të vlerësojë dhe mirëpresë kontributin e të gjitha institucioneve publike, organizatave dhe shoqërisë civile, MEDIA-s dhe publikut, për të përcjellë të dhëna dhe informacione në lidhje me kandidatët, të cilat do të shqyrtohen me vëmendje të veçantë, objektivitet dhe profesionalizëm, në funksion të verifikimit të gjithanshëm dhe sa më të thelluar të integritetit të kandidatëve, si dhe për të mundësuar përzgjedhjen mes tyre, të kandidatëve bazuar në meritat profesionale dhe morale”, thekson KED.
