Juristi i njohur, Kreshnik Spahiu ka folur dje për protestën e 21 janarit të vitit 2011, ku gjatë protestës së thirrur nga opozita, Garda e Republikës vrau katër protestues dhe plagosi qindra të tjerë.
Përmes një statusi në rrjetet sociale, Spahiu teksa heq një paralele me protestat që ndodhën në SHBA kur ish-presidentit Donald Trump humbi zgjedhjet në vitin 2020, akuzon Berishën se vrau opozitën.
“Demokratët po përpiqen të justifikojnë 4 vrasjet e tyre, me 4 vrasjet në Uashington të mbështetësve të Trump. Për turpin e tyre ata harrojnë dy fakte: Vrasjet në Tiranë u bënë në Bulevard dhe viktimat ishin të pa armatosur, ndërsa në Uashington vrasjet u bënë brenda në zyrat e Kongresit Amerikan dhe protestuesit hyn të armatosur; Në Shqipëri pushteti vrau opozitarë.
Ndërsa në Amerikë Trump ishte ende në pushtet dhe protestues njëkohësisht”, shkruan ai. Ndërkohë juristi Kreshnik Spahiu tregoi në një intervistë televizive se organizata mafioze Ndragheta në Gjermani ka investuar miliarda euro në biznese të ligjshme kryesisht në energjinë e rinovueshme. Spahiu u shpreh se trafiku i drogës në Evropë i Ndragheta kap vetëm 20 për qind të aktivitetit të saj, pasi 80 për qind janë aktivitete të tjera.
Sipas Spahiut, mafia nuhat tregun dhe Shqipëria si një vend i vogël me një popullsi të vogël nuk përbën interes për mafien italiane. “Mafia nuhat tregun më shumë se çdo biznes tjetër, a përbën Shqipëria treg për Ndraghetën? Shqipëria është vend i vogël, numri i popullsisë është më i vogël.
Kjo s’do të thotë që Shqipëria nuk është e paprekshme. Janë shqiptarë që kanë kërkuar bashkëpunim me familje mafioze që mund të strehohen në Shqipëri. Shqipëria shihet si një mundësi e parajsës fiskale për të pastruar paratë e mafias, por kapaciteti këtu është shumë i kufizuar”, nënvizoi Spahiu.
