Prokuroria e Posaçme kundër Kurrupsionit dhe Krimit të Organizuar në bashkëpunim ne policinë e Tiranës ka arrestuar disa punonjës në institucionet publike në kryeqytet.
Personat nën hetim të përfshirë në veprimtarinë kriminale janë 5 inspektorë të Institutit Shtetëror Shëndetësor; një punonjës i Drejtorisë Rajonale të Operatorit të Shërbimit të Kujdesit Shëndetësor Tiranë; tetë punonjës të Njësisë Vendore të Kujdesit Shëndetësor dhe Qendrave Shëndetësore të ndryshme në Tiranë, si dhe administratorë dhe përfaqësues të subjekteve tregtare të ndryshëm.
Arrestimet janë bërë me urdhër të SPAK. Të arrestuarit akuzohen se duke shpërdoruar detyrën lëshonin libreza për punësim, në mënyrë abuzive.
Nga ana tjetër Gjykata e Posaçme ka vendosur caktimin e masave të sigurimit “arrest me burg” për dy persona nën hetim, “arrest në shtëpi” për nëntë persona si dhe “Pezullim i ushtrimit të detyrës apo shërbimit publik për tre persona nën hetim.
Abc News raporton se duke shpërdoruar detyrën të gjithë këta punonjës bashkëpunonin me njëri-tjetrin, pasi kryenin kontrolle në subjekte të ndryshme tregtare në Tiranë edhe pse gjendeshin në shkelje deklaronin të kundërtën.
Mësohet se këta të fundit duke iu marrë ryshfet plotësonin librezën duke shënuar se nuk është konstatuar shkelje.
Masa arrest me burg është dhënë për Niko Nika dhe Hazis Lura.
Në arrest shtëpie u lanë Eda Myftari, Ihsan Hasani, Franc Daija, Ilir Hoxha, Ornela Balla, Johana Sinani, Arjan Gjoka, Evald Bejaj, Anda Muçaj.
Luiza Metani (Goduni), Diana Hysi dhe Marinela Sulmina (Hysi) u pezulluan nga detyra.
Ndërkaq, hetimet vijojnë edhe për persona të tjerë, të cilët dyshohet se janë të përfshirë në këtë histori
Sipas Prokurorisë së Posaçme hetimet kanë vijuar prej disa muajsh. Ndërsa, të arrestuarit akuzohen për veprat penale, “Korrupsion pasiv i personave që ushtrojnë funksione publike”, “Ushtrimi i ndikimit të paligjshëm ndaj personave që ushtrojnë funksione publike” dhe “Shpërdorim detyre”.
