Gjykata e Lartë ka hedhur poshtë ankimin e SPAK për rikthimin në qeli të mjekut Edvin Prifti. Ishte SPAK që kërkoi rikthimin në qeli të kardiokirurgut të QSUT, Edvin Prifti mirëpo u rrëzua nga Gjykata.
Po ashtu, ditën e sotme është rrëzuar dhe kërkesa e Priftit për shuarjen e akuzës dhe heqjen e masës detyrim paraqitje.
Seanca nisi ditën e sotme në orën 12:00 dhe kërkesa u shqyrtua nga trupa e përbërë nga Sandër Simoni, Klodian Kurushi dhe Albana Boksi.
Prokuroria e Posaçme (SPAK) iu drejtua Gjykatës së Lartë pas ndryshimit të masës së sigurisë për shefin e Kardiologjisë Edvin Prifti, të cilin Apeli e la të lirë dhe ka kërkuar kthimin e tij në burg.
Kardio-kirurgu Edvin Prifti u la i lirë nga qelia pak ditë pas arrestimit të tij të bujshëm. Ai është rikthyer edhe në detyrë si pedagog, ndërsa mjekësia do të duhet të presë pak për të.
SPAK zgjati me gjashtë muaj hetimet për mjekun Prifti, pasi siç thuhej në njoftimin zyrtar, hetimet janë shtrirë edhe në drejtim të disa procedurave të prokurimit të realizuara nga QSUT.
