Për socialistët Ilir Meta po shkatërron institucionin kryesor të vendit nga frika e SPAK. Ditët e fundit kreu i shteti ka ashpërsuar dozën sulmeve ndaj mazhorancës, por për socialistët ai është i alarmuar nga reforma në drejtësi e shkatërrimi i LSI.
Në një prononcim për gazetës “Sot”, deputetët e PS i kanë bërë thirrje kreut të shtetit që të sillte si shtetar dhe jo si rrugaç. Fillimisht ka qenë deputetja socialiste e qarkut të Gjirokastrës, Artemis Malo, e cila gjatë një prononcimi për gazetën “SOT”, i kërkoi Metës që të sillet si president, ndërsa i kujtoi këtij të fundit se pavarësisht retorikës dhe gjuhës së ashpër të artikuluar prej tij, ai nuk e shpëton dot Lëvizjen Socialiste për Integrim nga shkrirja.
Sipas zonjës Malo, Meta ka frikë nga shkrirja e LSI andaj edhe është zhveshur nga kostumi i kreut të shtetit. “Sjellja dhe gjuha e përdorur nga presidenti Ilir Meta ndaj qeverisë dhe mazhorancës është e turpshme dhe e dënueshme. Ilir Meta nuk e meriton të jetë President i Republikës së Shqipërisë dhe a duhet shkarkuar një orë e më parë.
Partia Socialiste nuk ja ka për borxh Ilir Metës që të durojë atë që është kthyer në një vagabond dhe kryetar i opozitës. Meta ka frikë nga shkrirja e Lëvizjes Socialiste për Integrim dhe e di shumë mirë që në 25 prill qytetarët shqiptarë do t’i japin atij dhe opozitës goditjen e radhës. Kështu që i ndodhur përpara kësaj situate dhe teksa po shikon që po i vjen fundi, Meta sulmon me një gjuhë që edhe rrugaçët e kanë zili”, deklaroi deputetja e PS, Artemis Malo.
Çela: SPAK do jetë makthi i tij
Por një përgjigje për presidentin Ilir Meta e ka edhe deputeti i Partisë Socialiste, Bujar Çela. Ky i fundit gjatë një prononcimi për gazetën “SOT”, zbuloi dje lojën dhe frikën që ka Ilir Meta, që sipas tij, është drejtësia e re.
Madje, teksa i kujtoi se e ka vendin në burg, zoti Çela shprehu bindjen se makthi i presidentit Meta është SPAK-u. “Presidenti Ilir Meta bën mirë të qëndrojë në kafazin që e ka futur Partia Socialiste, pra ne kemi në kafaz që s’ka nga ia mban dhe nuk është nëpërkëmbët e politikës. Por di të them se reforma në drejtësi do ta çojë Ilir Metën po në një kafaz, por jo si ky i pari, ku ka luks, por atje ka vetëm supë.
Kështu që ulërimat e banorit të kafazit politik po tregojnë se sa mirë e njeh ai veten dhe rrugën që e pret që nëpërmjet strukturave të drejtësisë do të shkojë në kafazin e përjetshëm që është burgu. Pra, nuk dua të zgjatem se e gjithë Shqipëria e di kush është Ilir Meta dhe përse ai është tërbuar, pasi SPAK është makth i tij. Ilir Meta nuk e meriton të jetë president i Shqipërisë! A e dini pse? Sepse ka shkarje ledhi”, deklaroi deputeti i PS, Bujar Çela.
Koçi: Meta ka paqartësi mendore
Megjithatë në një linjë me deputetët socialistë, madje më i ashpër me presidentin Ilir Meta është treguar edhe kreu i Partisë Socialiste të Fierit, Petro Koçi. Ky i fundit gjatë një prononcimi për gazetën “SOT”, deklaroi dje se presidenti Meta prej 2 vitesh është zhveshur nga kostumi i kreut të shtetit dhe i ka hapur “luftë” qeverisë e Kushtetutës, ndërsa theksoi se ai nuk do t’ia dijë për Shqipërinë, por sipas tij, është i shqetësuar vetëm për Lëvizjen Socialiste për Integrim.
“Prej 2 vitesh presidenti Ilir Meta ka rrëshqitur psikologjikisht dhe ka paqartësi mendore. Kushtetuta e Shqipërisë është gjëja e fundit për të cilën Meta mendon, pasi shqetësimi i tij kryesor është biznesi politik, Lëvizja Socialiste për Integrim. Rasti i zhdekretimit të zgjedhjeve vendore të 30 qershorit të vitit 2019 është shkelje e rendë e Kushtetutës dhe projekt për përplasje civile.
Nuk është çudi që presidenti Meta nëse ia thotë mendja të zhdekretojë edhe zgjedhjet parlamentare të 25 prillit të vitit 2021. Kështu që për sa kohë që Ilir Meta është President, Kushtetuta dhe shteti janë të rrezikuar”, deklaroi zv/ministri i Mbrojtjes, Petro Koçi.
