Në shtator, dosja e 21 Janarit pritet të ketë zhvillime të forta. Avokati i familjarëve të viktimave të 21 janarit Idajet Beqiri ka dhënë për gazetën “SOT” emrat “VIP” që pritet të dëshmojnë në Prokurorinë e Posaçme për të plotësuar provat e ekzekutimeve në bulevard, të cilët në fund do të nxjerrin fajtorët e padënuar gjithë këto vite. Z.Beqiri paralajmëron gjithashtu se do të ketë finalizime me masa sigurie të krimit të ’21 Janarit’ në shtator. “Provat janë thuajse të plota por do të plotësohet edhe me deklarime të tjera të cilat janë shumë të fuqishme dhe provojnë katërçipërisht atë që provoi Gjykata e Strasburgut që është një krim shtetëror. Ajo është realisht një masakër shtetërore pasi aty katër persona vdiqën por në të vërtetë u plagosën edhe 137 persona ndaj të cilëve u qëlluan dhe u plagosën.
Por qëllimi nuk ishte vetëm të qëllohej ndaj tyre por të vriteshin edhe ata. Kemi plagosjen e gazetarit Fatos Mahmutaj i cili ka bërë një deklarim në një proces hetimor të parregulltë por tani duhet të thirret sërish nga hetimet që po bën SPAK. Si dhe nga ana tjetër kemi edhe deklaratën rrëqethëse të Sokrat Godos, i cili ngeli i plagosur rëndë në atë ngjarje. Drejtimi i plumbit ndaj tij nga skuadra që bëri ekzekutimet e urdhërave të Ndrea Prendit, ishte në zemër të tij. Ai ishte ish-oficer i SHIK-ut, i skeduar nga SHIK-u i Sali Berisha, si një person ‘i rrezikshëm’, pasi përkrahte PS, madje e kishte pushuar dhe nga puna Berisha. Që kur kishte ardhur nga Berati në protestë, ai erdhi i shënjuar, me fotografi e të gjithë snajperat do të vepronin kundër tij dhe vepruan në fakt. Mjaft nga këta që u veprua, ishin të gjithë nga ata që SHIK-u i kishte të evidentuar si gjoja njerëz të rrezikshëm kundër pushtetit të Berishës.
Këta janë organizator, e të fuqishëm që mund të bëjnë popull më vete e mund të më marrin pushtetin mua. Pritet deklarimi dhe i Sokrat Godos në SPAK, sikurse do të merret dëshmia e ish-presidentit Bamir Topi, ish-prokurores së Përgjithshme, Ina Rama, të ish-drejtorit të përgjithshëm të Policisë së Shtetit të asaj kohe, ish-punonjësi i kryeministrisë i cili fshiu dhe zhduku për të gjithë natën serverat. Pra, do të kemi zhvillime dhe shtatori do të ketë dhe masa sigurimi. Jam i bindur, masa sigurimi për Sali Berishën për Ilir Metën, për Monika Kryemadhin dhe për disa ish-ministra të tjerë të Sali Berishës. Do të thellohen hetimet dhe do të pyeten të gjithë personat që kanë gisht në këtë masakër dhe do të marr emrin e vërtetë, krim shtetëror siç ka emrin. Do të ketë finalizime me masa sigurie të krimit të ’21 Janarit’”, u shpreh avokati Idajet Beqiri. Sipas tij, në SPAK do thirret dhe gazetari Artan Hoxha. “Artan Hoxha për kasetën do të shpjegojë edhe për burimin se si ka rënë ajo kasetë në dorën e tij, do të identifikohet zëri në audio përgjimin e kasetës se i kujt është dhe nga kush e ka marrë urdhrin për zbatimin e ekzekutimit mbi turmën”, tha ai.
Kallëzimi i PD për 3 gjyqtarët që urdhëruan rihapje e vrasjeve të 21 janarit!
Nga ana tjetër, ai e quajti “një shoë’ kallëzimin penal që Adriana Kalaja, bëri pak ditë më parë në emër të Partisë Demokratike për 3 anëtarët e Gjykatës së Lartë të cilët vendosën që dosja e vrasjes së Aleks Nikës më 21 janar të hetohej nga Prokuroria e Posaçme. “Nuk mund të bësh kallëzim penal për gjyqtarët e Gjykatës së Lartë që kanë dhënë një vendim të drejtë. Aq më shumë që nuk di ta recitosh atë që të kanë dhënë. Rekursi jonë nuk ishte për kundërshtimin e kompetencës. Rekursi jonë ka qenë me kërkesë të saktë: Regjistro procedimin penal, dhe mu përgjigj ose me vendim mosfillimimi, ose hetoje e pushoje ose çoje në gjyq. Por nuk ke të drejtë një kallëzim penal që unë bëj për subjekte që janë në kompetencë të SPAK dhe me emra konkretë që urdhërdhënësit e vrasjes së 21 janarit është Sali Berisha, Lulzim Basha, Ndrea Prendi dhe organizata kriminale që krijuan për ti bërë këto ekzekutime, SPAK e ka për detyrë të regjistrojë procedimin penal e të dalë me vendimmarrje. Këtë analizë ka bërë Gjykata e Lartë e cila urdhëroi regjistrimin e procedimit penal se kemi të bëjmë me vendim,” tha ndër të tjera Beqiri./Elmas Bogdani
