SPAK, (Prokuroria e Posaçme), ka nisur verifikimet për regjistrin me të dhënat personale të qytetarëve, që ndodhet në duart e drejtuesve të Partisë Socialiste në të gjitha degët.
Edhe pse edhe vetë drejtuesi i SPAK, Arben Kraja ishte në këtë regjistër, i shënuar si një votues potencial i Partisë Socialiste, burime nga Prokuroria e Posaçme bëjnë me dije se SPAK ka nisur sot hetimet.
Pritet që të merren në pyetje drejtuesit e PS për të parë se a është i vërtetë një database i tillë dhe se nga janë marrë të dhënat, pasi portali deklaron se është përdorur E-albania.
Skandali është zbuluar ditën e djeshme nga Lapsi.al. Një database me të dhënat e mbi 910 mijë votuesve, përfshirë këtu një sërë emrash të njohur të gazetarëve si Blendi Fevziu, Ylli Rakipi, Mero Baze, Fatos Lubonja, Andi Bushati, Armand Shkullaku, Arjan Cani dhe Eni Vasili, janë të skeduar me preferencat politike dhe shanset se për kë do të votojnë me 25 prill.
Sipas portalit, ky regjistër elektronik është shpërndarë në të gjitha degët e PS në Shqipëri dhe të dhënat janë marrë nga e-albania. Në një reagim, AKSHI mohoi të ketë gisht në këtë database, ndërsa Taulant Balla tha se PS ka regjistra prej vitesh.
