Prokuroria e Posaçme ka rikthyer ankthin mes gjyqtarëve dhe prokurorëve të ngelur në veting. Bashkimi Europian e ka kusht për hapjen e negociatave hetimin e tyre dhe jashtë vëmendjes së publikut,
SPAK po punon fort për këtë çështje. Sipas informacioneve, prokurorët specialë kanë nisur hetimet për 23 emra të ngelur në veting mes të cilëve edhe ish-anëtarë të Gjykatës së Lartë dhe asaj Kushtetuese. Nga ana tjetër, bëhet e ditur se SPAK ka nisur procedurat për të verifikuar ligjshmërinë e pasurisë.
Kjo do të thotë se shumë emra rrezikojnë që t’u sekuestrohen pronat. Ka qenë ministrja e Drejtësisë, Etilda Gjonaj, e cila u shpreh se SPAK ka vënë nën hetim penal 9 gjyqtarë dhe prokurorë që kanë qenë pjesë e Gjykatës së Lartë dhe asaj Kushtetuese dhe janë shkarkuar më pas nga vetingu.
Gjatë fjalës së saj në mbledhjen e Këshillit Kombëtar të Integrimit, Gjonaj theksoi se hetimi i tyre do të jetë në fokusin e punës së Prokurorisë së Posaçme. “Deri tani SPAK ka filluar procedim përderisa zyrtarë të lartë, ish-prokuror i Përgjithshëm, ish-anëtarë të Gjykatës Kushtetuese.
Të gjitha institucionet përgjegjëse do të vijojnë të procedojnë në koordinim për të referuar gjyqtarë dhe prokurorë që janë shkarkuar nga vetingu dhe që paraqesin indicie për veprimtari kriminale. SPAK ka filluar procedim penal kundër 23 ish-magjistratëve, përfshirë këtu 9 çështje të gjyqtarëve dhe prokurorëve në nivel të lartë. Hetimet e pasurisë lidhur me këto raste janë në proces”, tha Gjonaj.
Emrat nën hetim
Bashkimi Europian ka kërkuar hetim për të ngelurit në veting, ku anëtarët e Gjykatës së Lartë dhe asaj Kushtetuese janë shkarkuar pas problemeve të shumta me pasurinë. SPAK ka tërhequr të gjitha dosjet e gjyqtarëve të Gjykatës Kushtetuese dhe të Gjykatës së Lartë, të cilët janë shkarkuar nga vetingu për të verifikuar nëse ka elementë të veprës penale për pastrim parash apo korrupsion dhe fshehje pasurie.
Hetimi u është besuar dy prokurorëve, ndërsa ekspertët financiarë do të verifikojnë çdo transaksion ndër vite. Por ajo që bie në sy mes këtyre emrave është ish-kryetari i Gjykatës së Lartë, Xhezair Zaganjori dhe ai i Kushtetueses, Bashkim Dedja, hetimet e të cilëve shihen me mjaft interes nga qytetarët dhe ndërkombëtarët.
Ndërkohë gazeta ka mësuar se përveç këtyre 2 emrave, në skaner janë edhe gjyqtarë të tjerë të Gjykatës së Lartë dhe Kushtetuese, si Shkëlzen Selimi, Admir Thanza, Artan Broci, etj, të cilët kanë ngelur gjatë procesit të vetingut. Kjo do të thotë se nëse hetimet vijojnë me ritme të shpejta, shumë shpejt pritet të shohim frytet e para të punës së SPAK.
Pasuria e gjyqtarëve
SPAK jo qëllimisht ka nisur hetimet me ish-anëtarët e Gjykatës së Lartë dhe të Gjykatës Kushtetuese, që i ka futur në skaner. Nga një përllogaritje, rezulton se ish-anëtarët e Gjykatës së Lartë dhe Kushtetuese zotërojnë bashkë rreth 12 miliardë lekë pasuri (të deklaruar).
Të dhënat janë siguruar nga agjencia “BIRN”, e cila ndër vite ka bërë disa publikime mbi pasuritë e ish-anëtarëve të Gjykatës së Lartë. Sipas këtyre të dhënave, vetëm 10 ish-anëtarët e fundit në Gjykatën e Lartë kanë deklaruar nga fillimi i detyrës e deri në vitin 2015, një pasuri me vlerë 1.043.074.723 lekë të reja.
Pra diku te rreth 11 miliardë lekë të vjetra. Por nëse fusim dhe disa prej anëtarëve të mbetur në detyrë deri ditët e fundit, sikundër ishte Zaganjori, kjo shifër del më e lartë. Këtu nuk përfshihen prona dhe pasuri të tjera të fshehura që janë zbuluar nga vetingu dhe që kanë vlerë shumë më të lartë.
Ndërkohë sipas të dhënave të deklaruara nga “Birn”, nuk mbeten pas dhe anëtarët e Gjykatës Kushtetuese. Kjo e fundit vitet e fundit mbeti me 6 anëtarë dhe vetëm 1 i mbijetoi vetingut (Vitore Tusha), ndërsa 5 të tjerë u shkarkuan. Këta të pestë kanë deklaruar në total një pasuri me vlerë rreth 200 milionë lekë të reja, ose rreth 2 miliardë lekë. /
SHKRUAR NGA ELISJEDA KIKO
