Avokati Spartak Ngjela paralajmëroi ditën e djeshme se mega-operacioni i të dielës pasdite është vetëm hapi i parë i hedhur në luftën kundër krimit dhe korrupsionit. Në një prononcim të dhënë për gazetën “SOT”, Ngjela deklaroi se numri i arrestimeve të fundjavës është i lartë, ndërsa theksoi se politikanët janë tmerruar nga ky operacion. “Ky është një hap i ri përpara drejt stabilizimit të një shteti normal në Shqipëri. 40 arrestime në një ditë do të ishte tronditëse në çdo vend të botës, sado i madh të jetë. Gazetaria shqiptare merret me broçkulla. Politika është e trembur.
Po t’i qëndrojmë precedentëve të shteteve që kanë bërë reforma kundër krimit dhe kundër korrupsionit të vendit të tyre, flas për perëndimin, atëherë arrijmë në përfundimin që ky është hapi i parë i madh drejt një progresioni antikorrupsion dhe antikrim në Shqipëri”, u shpreh avokati. Sipas tij, të tilla operacione do të vazhdojnë edhe në ditët në vijim, duke paralajmëruar kështu edhe goditje të tjera në nivele të larta. Për Ngjelën, pasditja e të dielës shënoi edhe fillimin e epokës kundër krimit dhe korrupsionit. “Jam i mendimit që do të vazhdojë. Duke u nisur nga ky fakt arrijmë në konkluzionin racional se gjithçka do të ecë drejt një progresi dhe unë mendoj se dita e pardjeshme është fillimi i epokës antikrim dhe antikorrupsion në Shqipëri”, u shpreh avokati.
Metoda për të kapur pushtetarët
Spartak Ngjela zbuloi ditën e djeshme edhe mënyrën sesi do të arrihet në arrestimin e pushtetarëve të lartë. Ai deklaroi se fillimisht goditen grupet e strukturuara kriminale, më pas mbërrihet tek politikanët dhe së fundmi vijohet me goditjen e korrupsionit dhe krimit në çdo nivel e në çdo fushë pa dallim. Ngjela u shpreh se fakti që në Tiranë ndodhen edhe ekspertët e SHBA-BE tregon që aksione të tilla do të vijojnë sepse bëhen me ndihmën e ndërkombëtarëve. “Cila ka qenë metoda e eliminimit të korrupsionit dhe krimit të organizuar nëpër vendet e caktuara të Evropës? Metoda ka qenë kjo, në fillim është goditur krimi në spektër të gjerë, pastaj janë kapur metastazat e krimit në politikë dhe pastaj është vijuar me të gjithë korrupsionin që ka penguar zhvillimin e një vendi të caktuar.
Kjo do të thotë se e njëjta gjë do të ndodhë edhe në Shqipëri. Këto janë metoda të cilat nuk kanë dalë në Shqipëri dhe ajo çka është më kryesorja të thuhet është fakti që e gjitha kjo nuk drejtohet nga agjencia ligj-zbatuese dhe policia shqiptare, por drejtohet nga agjencitë dhe politikat e mëdha, nga politika amerikane dhe politika gjermane. Madje ju e dini që ekspertët janë këtu”, u shpreh avokati Spartak Ngjela.
Operacioni i të dielës
Operacioni i koduar “Volvo 4” goditi pasditen e të dielës, duke u shtrirë në 12 qytete dhe duke goditur anëtarët e katër grupeve të skeduara kriminale. Të dielën në pranga ranë edhe dy-ish deputetë të Partisë Socialiste, Arben Ndoka dhe Arben Çuko. Arrestimin e këtyre të fundit, ish-kryetari i Shërbimit Informativ Shtetëror, Fatos Klosi e pa si një mesazh që goditja kundër krimit nuk ka ngjyrë. “Ata që u arrestuan dje janë ish-deputetë, ish-nëpunës të shtetit. Arrestimi i tyre më duket më shumë si mesazh sesa që e meritonin ata. Them se është mesazh për politikën në tërësi. Unë e quaj mesazh i cili thotë që shiko ne nuk po pyesim kush ka qenë, si ka qenë apo kush është, ne thjesht po bëjmë punën tonë. Unë kam besim që arrestimet do të përshkallëzohen, duke qenë se korrupsioni në Shqipëri është një fenomen mjaft i përhapur”, tha Fatos Klosi për gazetën.
