Avokati Spartak Ngjela ka folur për zhvillimet brenda Partisë Demokratike. Me anë të një postimi në rrjetet sociale, ai u shpreh se ish-kryeministri Sali Berisha hyri i gëzuar në selinë e Partisë Demokratike pak ditë më parë, por u largua i frikësuar.
Ai u shpreh i bindur se Berisha nuk bën dot revolucion. “Saliu ishte shumë i gëzuar kur hyri për të marrë selinë e Partisë Demokratike, por pse iku gjithë frikë? E dini pse? Sepse aty brenda pa shenjat e superfuqisë. Po tani që i pa këto shenja, çfarë do të bëje Saliu? Asgjë më.
Aty e kishte Selinë, pse nuk e mori? Sipas të dhënave të mia, në Shqipëri janë edhe 1800 ushtarakë rusë në ndihmë të Saliut, pse nuk e mori selinë? E thamë: Ai iku i trembur, sepse pa aty brenda shenjat e superfuqisë”, tha ai. Ndër të tjera, Ngjela ngriti pyetjen se pse ish-kryeministri Berisha e la sipas tij betejën që nisi dhe iku nga selia. Ai u shpreh, se Berisha nuk realizoi atë që kishte thënë më parë se kur të hynte në selinë e Partisë Demokratike ai do të nxirrte jashtë zyrtarët e Partisë Demokratike.
“Pse e la Berisha fushëbetejën dje dhe iku nga selia e Partisë Demokratike me bisht ndër shalë ? Pse nuk i mori dot zyrtarët e Partisë Demokratike me dhunë, pasi hyri brenda Selisë për t’i marrë ato? Ai kështu na kishte thënë”, tha ai.
Teksa u ndal tek akuzat e bëra nga lideri demokrat Lulzim Basha në drejtim të ish-kryeministrit Sali Berisha, avokati Spartak Ngjela u shpreh, se në këtë betejë Berisha është ai i cili është i humburi. Ai vijoi më tej duke thënë, se lideri demokrat e akuzoi Berishën tani për krimet e bëra dhe jo më parë pasi sipas tij, këtë Bashës mund t’ia ketë kërkuar superfuqia, duke iu referuar Amerikës.
“Ke humbur Sali, kurse Basha të akuzoi për krimet që ke kryer. Më mirë vonë, se kurrë! Po Basha, që e akuzoi Saliun kaq vonë, e kishte të vetin këtë akt, apo ia kërkoi superfuqia? Këtë duhet ta dijë Saliu më mirë, sepse ai iku nga fushëbeteja me bisht ndër shalë”, tha ndër të tjera, Ngjela.
Ngjela: SPAK të veprojë
Avokati Spartak Ngjela u shpreh, se SPAK i ka gati dosjet për ish-kryeministrin Sali Berisha, Ai theksoi, se SPAK nuk duhet që të vonojë për të vepruar. “Po SPAK-u, a i ka denoncuar krimet që përmendi Basha. Sigurisht që i ka denoncuar ato, por edhe krime të tjera më të rënda. Por, a do ta nisë SPAK-u procesin penal kundër Saliut? Kjo pritet për t’u parë.
Por SPAK-u nuk duhet të vonohet, se forcën e superfuqisë nuk e ka parë vetëm Saliu”, tha ai. Sakaq, avokati Ngjela vijoi më tej duke thënë se duhet që të presim se si do të vazhdojnë ngjarjet brenda Partisë Demokratike. Ai theksoi, se SPAK sipas tij, është ngritur për të shpëtuar vendin nga krimi i organizuar dhe nga korrupsioni. “Të shohim këto ditë sesi do të vijojnë ngjarjet, por SPAK-u është ngritur për të shpëtuar shqiptarët nga krimi organizuar dhe nga korrupsioni shtetëror i lidhur me të. Do të dalë dot SPAK-u nga kjo kërkesë dhe nga ky motiv historik?!, tha ai.
