“Komentet nëse jam unë kurbani apo jo, kjo nuk është aq e kollajtë të jem unë. Nuk më shqetëson”.
Saimir Tahiri është i pari zyrtar i nivelit kaq të lartë që do të përballet në një proces gjyqësor me dy akuza tepër të rënda, trafikimin e narkotikëve të kryer në bashkëpunim, në formë të posaçme të grupit të strukturuar kriminal, si dhe korrupsionin pasiv të funksionarëve të lartë shtetëror.
Gjykata e Krimeve të Rënda rrëzoi sot kërkesën për pushim të çështjes dhe vendosi të dërgojë për gjykim Saimir Tahirin dhe tre ish-drejtuesit e policisë. Ish-Ministri i Brendshëm Saimir Tahiri dhe ish-drejtori i policisë së Vlorës Jaeld Çela përmes avokatëve të tyre kanë kërkuar nga gjykata gjykim të shkurtuar pa pranim fajësie.
Ndërsa për të pandehurit e tjerë nuk është marrë parasysh nga gjykata kërkesa për gjykim të shkurtuar. Dosja tani kalon në short dhe përcaktohet një tjetër trupë gjykuese që do të merret me gjykimin e çështjes.
Pas seancës maratonë me dyer të mbyllura që zgjati rreth 8 orë, ish-Ministri i Brendshëm Saimir Tahiri tha se ajo që vjen para është më e rëndësishme se ajo që kaloi.
Tahiri: Zgjati se kishim gjëra për të thënë lidhur me atë që parashtruan prokurorët. Më shumë se afati 8 orë i zgjatjes së seancës sot më vjen keq për ju që pritët. Ajo që vjen para është më e rëndësishme se ajo që shkoi. Tani shkojmë në gjykim dhe ky është një shans për mua për të treguar atë që kam thënë gjithmonë. Nuk dua të merrem me llojin e seancës, llojin e akuzës.Kërkova që gjykimi të mos jetë një histori zvarritje e pafund, prokuroria pretendon atë që pretendon. Unë kam shumë më shumë për të pretenduar se prokuroria, kështu që nuk ka nevojë për zgjatje pafundësisht.
Do të vazhdoj deri në fund të argumentoj atë që kam pretenduar nga fillimi që nuk kam pikë lidhje me këtë çështje, atë që vërtetoi prokuroria e Italisë, gjykata italiane. Prokurorët mendojnë se pikërisht vendimi i Italisë është gjetje që nuk kam lidhje fare, prokurorët argumentojnë ndryshe. Kjo është çështje e tyre, do ta shohim në gjykim. Drejtësia prandaj është e bukur, në pjesën dërmuese të rasteve nuk bën drejtësi por në ato pak raste kur bën drejtësi ja vlen.
Karroca me dosje?
Tahiri: E kam zor të flas për veten kur gjendem në këto pozita, po ndjek me përpikmëri çdo fazë të gjykimit.Nuk jam zënë me askënd por kur kjo ndodh me mua merre me mend çfarë ndodh me njerëzit që nuk kanë mundësinë të flasin para jush. Unë nuk jam as ndonjë hero i heshtur as më pëlqen pozita e një njeriu me poza heroike por realisht më vjen keq për nejrëzit që vuajnë nga ky sistem drejtësie dhe nuk kanë mundësi të flasin para jush dhe të tregojnë me ulërima atë që ndodhi.
Keni pasur kontakte me bashkë të akuzuarit tuaj?
Tahiri: Asnjë kontakt.
Tahiri paralajmëron: Sot e tutje do të flas dhe unë
Keni kërkuar prova nga prokurorët provat konkrete dhe veprimet konkrete që ju keni kryer për të favorizuar grupin kriminal Habilaj. Cila ishte përgjigjja e tyre?
Tahiri: I kërkova Prokurorisë të më bëjë një akuzë të qartë dhe të saktë siç parashikon ligji. Prokuroria ka detyrimin të më tregonte në seancë cilin veprim kam bërë unë që kam shkelur ligjin. Prokuroria nuk u përgjigj.Nga sot e tutje që mbaron hetimi keni folur vetëm ju, unë nuk kam folur as për prova, as për procesin, as mënyrën si janë zhvilluar ngjarjet. Sot e tutje do të flas dhe unë sigurisht, në gjykatë dhe për publikun.Nuk mund të jetë më një proces i mbyllur, një proces ku provat të ashtuquajtura trafikohen.
Provat për pafajësi?
Tahiri: Ka kohë për të gjitha. Di t’ju them që ky proces i ka kapërcyer kufijtë e një maskarade të çdo lloj niveli por unë nuk mërzitem fare me këtë, jam mësuar edhe më keq sesa kaq.Nuk më shqetëson asgjë nga këto dhe them se do ja dal.
Kush janë njerëzit që ju sulmojnë?
Tahiri: Kur jeni në gjendje të nxirrni nga errësira gjëra që ja u japin prokurorët, shumë kollaj do ta keni të merrni nga unë atë që duhet.Le mos të nxitojmë për këtë.Dyshoj shumë fort se ky është sistemi i drejtësisë për të cilin luftova.Kjo mbetet për tu parë.
Çfarë pretendonit nga gjykata, kur ju kërkuat dhe pushim të çështjes?
Tahiri: Kjo është e gjitha absurditet, çfarë të pretendoj kur unë i drejtohem prokurorisë dhe gjykatës dhe i them më tregoni ku e kam shkelur ligjin dhe askush nuk më tregon dot një gjë, çfarë të them unë pastaj?
A bëri drejtësi gjyqtarja e seancë paraprake?
Tahiri: Nuk dua të komentoj se kam konflikt interesi në këtë rast, isha personi në gjykim bashkë me të tjerët. Në një rast tjetër do të kisha shumë për të komentuar.
Prokurorët a janë të paanshëm?
Tahiri: Nuk ka rëndësi fare se nga varen dhe nga kush varen.
Çfarë u diskutua në seancën maratonë
Ora 17:13 Përfundon seanca paraprake për ish-Ministrin e Brendshëm, Saimir Tahiri. Gjykata është tërhequr për vendim ndërsa prokuroria e Krimeve të Rënda kërkon dërgimin e çështjes në gjyq.
57 fashikuj u transportuan me karrocë nga prokuroria në seancën e Gjykatës së Krimeve të Rënda. Gazetaret RTV Ora kanë fokusuar momentin kur prokurorët kanë sjellë dosjen në gjykatë.
Burimet bëjnë me dije se në seancën me dyer të mbyllura pati debat nëse ka prova që e implikojnë ish-Ministrin e Brendshëm apo jo.
Nga pretendimet e avokatit të Tahirit Maks Haxhia, ish-Ministrit të Brendshëm por edhe avokatëve të tre ish-drejtuesve të policisë pretendohet se Prokuroria nuk ka asnjë provë që i fajëson.
Ata kërkojnë pushimin e çështjes pasi pretendojnë se nuk ka asnjë provë të vlefshme që çështja të shkojë në gjyq.
Në seancën maratonë, si rrallë ndonjëherë nuk është bërë asnjë sekondë pushim.
Pesë ditë më parë seanca u shty për shkak se organi i akuzës nuk kishte njoftuar të pandehurit e tjerë.
Avokati i Tahirit, Maksim Haxhia ka deklaruar se nëse vazhdon shtyrja e seancave do të detyrohet të kërkojë gjykim të shkurtuar.
Dosja e Tahirit në gjykatë
Më 28 shkurt, Prokuroria për krime të Rënda mbylli hetimet dhe çoi dosjen e Sajmir Tahirit në gjykatë.
Vetë tahiri kërkon pushimin e çështjes. Ish ministri shoqërohet nga avokati i tij Maksim Haxhia.
Ish-ministri është hetuar për dy akuza, trafikimin e narkotikëve të kryer në bashkëpunim, në formë të posaçme të grupit të strukturuar kriminal, si dhe korrupsionin pasiv të funksionarëve të lartë shtetëror.
Në lidhje me akuzën e parë, Prokuroria ngre dyshimet se Tahiri ka qenë në dijeni të veprimtarisë kriminale të Moisi Habilajt dhe të gjithë anëtarëve të tjerë të kësaj bande dhe ka siguruar paprekshmërinë e veprimtarisë kriminale të tyre.
