Udhëheqësit e BE-së do të mblidhen sot në Bruksel në një samit të posaçëm për mbrojtjen, pasi presidenti i Francës Emmanuel Macron paralajmëroi se Europa është në një pikë kthese të historisë.
Përveç riarmatimit, liderët pritet të diskutojnë se si mund të mbështetet më tej Ukraina, pas njoftimit të presidentit amerikan Donald Trump të hënën se ai do të pezullonte ndihmat për Ukrainën. Presidenti ukrainas Volodymy Zelensky është i ftuar në samit.
Nervat janë bërë tel gjithnjë e më shumë në të gjithë Evropën që nga përballja e Trump dhe Zelensky në Shtëpinë e Bardhë javën e kaluar, dhe retorika rreth samitit të së enjtes nuk lë asnjë dyshim për rëndësinë që zyrtarët e BE-së po i kushtojnë asaj.
Tre vjet pas pushtimit të plotë të Ukrainës nga Rusia, hapat e administratës Trump ndaj presidentit rus Vladimir Putin kanë nxitur shqetësimin se Evropa nuk do të ketë mbështetje nga SHBA për sigurinë e saj, informon dritare.net.
Për këtë shqetësim, Presidenti Macron tha se Franca ishte e hapur për të diskutuar zgjerimin e mbrojtjes së ofruar nga arsenali i saj bërthamor për partnerët e saj evropianë, gjatë një fjalimi drejtuar kombit të mërkurën.
“Evropa po përballet me një rrezik të qartë dhe në një shkallë që askush prej nesh nuk e ka parë në jetën tonë”, tha shefja e Komisionit Evropian Ursula von der Leyen, ndërsa Presidenti i Këshillit Evropian António Costa tha se ky ishte një “moment përcaktues për Ukrainën dhe sigurinë evropiane”.
Të hënën, von der Leyen njoftoi një paketë të paprecedentë të mbrojtjes – të quajtur ReArm Europe (Riarmatosja e Evropës) dhe tha se Evropa ishte e gatshme të rriste shpenzimet e saj të mbrojtjes me shpejtësinë dhe ambicien që nevojitet.
Von der Leyen tha se tre propozimet e përshkruara në planin e ReArm Europe do të mbështesin Ukrainën dhe do të “adresojnë nevojën afatgjatë për të marrë shumë më shumë përgjegjësi” për sigurinë evropiane. Me gjasë duke iu referuar faktit që shumë evropianë mendojnë se kontinenti nuk mund të mbështetet më te SHBA për t’i ardhur në ndihmë në rast lufte.
Propozimet
Vendet mund të rrisin nivelet e deficitit kombëtar për t’i dhënë më hapësirë më shumë shpenzimeve të mbrojtjes!
150 miliardë euro kredi për investime në mbrojtje në fusha që mund të përfitojnë nga BE në tërësi. Për shembull mbrojtja ajrore dhe raketore, sistemet kundër dronëve dhe lëvizshmëria ushtarake
Lejimi i vendeve që të ridrejtojnë fondet e destinuara për programet e politikës së kohezionit (politika që synojnë të rrafshojnë dallimet midis rajoneve më shumë dhe më pak të favorizuara) për shpenzimet e mbrojtjes
Banka Evropiane e Investimeve do të lejohet gjithashtu të financojë projekte ushtarake.
Sipas von der Leyen, plani mund parashikon një total prej 800 miliardë eurosh në shpenzimet e mbrojtjes. Shumë liderë evropianë kanë sinjalizuar mbështetjen e tyre për veprim të shpejtë dhe vendimtar në lidhje me sigurinë e kontinentit.
“Ne duhet të jemi të bashkuar dhe të vendosur për të mbrojtur veten”, tha Macron. Ai shtoi se e ardhmja e Evropës nuk mund të lidhet me Uashingtonin apo Moskën. Presidenti francez tha se ndërsa ai dëshironte të besonte se SHBA do të qëndrojë pranë Europës, shtoi se duhet të jemi gati, se kjo edhe mund të mos ndodhë, informon dritare.net.
Presidenti francez planifikon të mbajë një takim me shefat e ushtrisë evropiane në Paris javën e ardhshme.
Macron tha se hapa vendimtarë do të ndërmerren në Bruksel, që Europa të jetë gati të mbrojë veten.
“Momenti kërkon vendime të paprecedentë”, përfundoi ai./BBC
