Deputeti i Partisë Demokratike, Dashnor Sula shprehet se politikanët që kanë drejtuar vendin këto 30 vite kanë përgjegjësi për gjendjen ku është sot Shqipëria.
Duke folur dje në një intervistë për mediat, deputeti Sula zbuloi se në vitin 2013 të gjithë e kuptuan që Berisha dhe Rama kishin një pakt që përfshiu edhe kreun e Lëvizjes Socialiste për Integrim në atë kohë Ilir Meta, i cili la qeverinë për t’u bashkuar me Partinë Socialiste.
“A kam unë rezerva për Sali Berishën? Pa diskutim shumë. Kam qasje të ndryshme për mënyrën se si është drejtuar PD-ja, apo si u bënë tani lëvizjet e Foltores. Nuk jam dakord me tezat e tyre, por jam opozitar dhe duhet të jemi të gjithë në protesta. Kam rezerva edhe për Ilir Metën.
Këta që kanë drejtuar politikën shqiptare këto vite kanë përgjegjësitë e tyre. Është faji i Ilir Metës dhe i Berishës për marrëveshjen e 1 prillit. Ishim në Parlament të gjithë në fund të marsit, të gjithë ishin të qeshur kur papritur iku Ilir Meta në 1 prill, si iku Ilir Meta?
Budalla unë nuk jam, mund të gënjesh një fshatarin tim por jo mua , unë e di si lëvizin gjërat. Dhe çfarë ndodhi? Pas 2013 më gjej një dosje të një ish-ministri apo ish-drejtori tonin që u akuzua për korrupsion para 2013-tës që të shkonte para drejtësisë për korrupsion?
Si nuk shkuan para drejtësisë Ndodhi sepse ka marrëveshje”, deklaroi ai. Ndërkohë i pyetur nëse mund të bashkohet Partia Demokratike, deputeti Sula u shpreh pesimist, teksa theksoi se secili duhet të lëshojë pak nga vetja nëse e do me të vërtetë bashkimin.
