Palët politike në vend duket se po hedhin në kosh draftin e propozuar nga amerikanët për reformën zgjedhore. Edhe pse ambasadorja Yuri Kim i mblodhi për dy ditë rresht përfaqësuesit e partive kryesore në vend dhe i detyroi të binin dakord për të mbyllur reformën zgjedhore para vendimit të negociatave, përplasjet janë rikthyer.
Reforma zgjedhore duket se është kthyer në kaos, pasi secila palë ka dalë me propozime dhe të gjithë duan të dalin të fituar në këtë mes. PD-LSI treguan dhe një herë se e firmosën me dhunë draftin, pasi tashmë kanë dalë me kërkesa të reja përtej marrëveshjes.
Këto parti kërkojnë që tenderi që do të bëhet për identifikimin biometrik të sanksionohet në Kodin Zgjedhor. Po ashtu kanë propozuar që zgjedhja e anëtarëve të KQZ të kalojë në 3 faza: Fillimisht të jetë Avokati i Popullit që të hapë garën për anëtarë, më pas të jetë një komision politik që të zgjedhë emrat dhe në fund lista t’i shkojë Parlamenti, i cili ta miratojë në bllok, pra me detyrim.
Por PD-LSI kanë dalë nga drafti i dakordësuar, pasi sipas tij anëtarët i zgjedh Kuvendi në bazë të eksperiencave. PD-LSI duan të fusin në lojë Avokatin e Popullit dhe po ashtu t’i zgjedhin vetë anëtarët. Kjo skemë pazaresh është refuzuar nga PS.
Refuzohen pazaret
Dje Oerd Bylykbashi dhe Petrit Vasili kanë kërkuar mbledhjen e Këshillit Politik, por Damian Gjiknuri ja u ka bërë të qartë se nuk do të ketë mbledhje nëse nuk ndryshojnë propozimin për KQZ. “Në lidhje me propozimin për formulën e emërimit të KQZ si dhe mekanizmat e vendimmarrjes që propozuar u shprehëm kundër dhe nuk mund të diskutohen më në mbledhjen e radhës. E gjykojmë një propozim jashtë marrëveshjes dhe traditës parlamentare për rolin e Kuvendit në zgjedhjen e KQZ.
Për këtë çështje do të diskutojmë pasi të na sillni paraprakisht një propozim tjetër që respekton faktin që Kuvendi është sovran në zgjedhjen e organit të KQZ duke siguruar edhe konsultimet dhe dakordësimet në lidhje me emrat që plotësojnë kriteret dhe kanë miratimin tuaj. Pra, e theksoj vetëm nëse sillni propozim të ri bazuar në këto parime mund të vazhdojë ky diskutim”, thuhet në letrën e z. Gjiknuri. Me dështimin e takimit duket qartë se drafti po shkon në humnerë.
Përçarje në opozitën parlamentare
Përveç konfliktit PS-PD-LSI, kemi një konflikt edhe brenda opozitës, e cila është ndarë në disa klane. Njëri klan është ai i deputetëve që janë shprehur pro miratimit të drafti që do të sjellin, PS, PD e LSI. Këtu bëjnë pjesë Lefter Maliqi e Suzana Topi.
Nga ana tjetër kemi grupimin e Myslim Murrizit, i cili ka kërkuar sistem proporcional dhe heqje koalicionesh. Fillimisht ishin 29 vetë që firmosën, por disa i tërhoqën firmat. Ditët e fundit është krijuar dhe një klan tjetër: Krenar Rryçi, Kujtim Gjuzi, Selami Jenishehri, Vasil Steriovski, Zef Shtjefni. Emrat e mësipërm kanë dalë kundër propozimit për sistem proporcional rajonal. Ata kërkojnë sistem proporcional kombëtar dhe heqje të pragut për marrjen e mandatit. Pra kanë dalë kundër propozimit që ka hedhur Myslim Murrizi dhe kanë vendosur kushte të reja.
Nga ana tjetër në prapaskenë flitet se PS e mbështet idenë e heqjes së koalicioneve. Në negociatat që zhvillohen mes palëve, flitet se drafti i 5 majit mund të dështojë në seancë plenare dhe kjo do i hapë rrugë një drafti të ri, ku nuk përjashtohet një takim Rama-Basha, por dhe ndryshimi sistemit dhe heqja e koalicioneve. Megjithatë mbetet të shihet pasi palët janë në negociata dhe gjithçka mund të ndryshojë. E sigurt është se draftin e propozuar nga amerikanët askush nuk e do. Publikisht si Rama, ashtu dhe Meta e Berisha kanë thënë se ai nuk ndryshon gjë. Po ashtu dhe PD nuk është se e do, por u detyrua nga amerikanët. E vetmja gjë që mund t’i vërë në rresht palët është një reagim tjetër i ambasadores amerikane./Sot/Nga Kliti Topalli
