Komisioni i Pavarur i Kualifikimit është i fokusuar tek ngritja e organeve të reja të drejtësisë. Gjatë dy muajve të fundit komisionerët kanë kaluar me prioritet në sitë kandidatët për në Strukturën e Posaçme Antikorrupsion, kandidatët për në Gjykatën e Lartë, kandidatët për Inspektoratin e Lartë të Drejtësisë apo edhe kandidatët për Prokuror të Përgjithshëm.
Por puna me garuesit e SPAK nuk ka mbaruar ende sepse janë akoma edhe pesë prokurorë për t’u kaluar në sitë, si edhe disa gjyqtarë që kanë shfaqur interes të jenë pjesë e Gjykatës së Posaçme Antikorrupsion. Për t’u përkushtuar në ngritjen sa më parë të SPAK, KPK ka vendosur që të mos hedhë më short deri në tetor. Deri tani KPK ka hedhur 8 shorte, ndërsa shorti më i fundit me emra gjyqtarësh dhe prokurorësh që do të kalojnë në sitë është ai i datës 18 mars 2019. Që nga kjo datë nuk ka më asnjë short tjetër sepse KPK ka vendosur unanimisht që të mos shortohet më asnjë gjyqtar a prokuror për t’iu nënshtruar procesit të rivlerësimit deri në muajin tetor. “Procesi i rivlerësimit për kandidatët për Strukturën e Posaçme kundër Korrupsionit dhe Krimit të Organizuar si dhe Gjykatën Kushtetuese është çështje me përparësi dhe duhet të përfundojë brenda një kohe sa më të afërt. Zhvillimi i procedurave të rivlerësimit dhe kryerja e hetimit administrativ të thelluar kërkon një kohë të konsiderueshme për t’u realizuar. Duke marrë parasysh këtë fakt, si dhe dinamikën përmes së cilës kalon një çështje, duke përfshirë kërkimin e informacionit, përpunimin dhe arsyetimin e gjetjeve, parashtrimin e tyre para trupit gjykues dhe vëzhguesit ndërkombëtar, Komisioni arsyeton se shpërndarja e çështjeve të reja do të shkaktonte ngarkesë, vonesë dhe zvarritje të procesit të rregullt për çështjet që tashmë janë shpërndarë me short dhe veçanërisht për çështjet me përparësi”, thuhet në vendimin e KPK. Kjo do të thotë se edhe muajt gusht e shtator do të kalojnë pa shorte nga ana e KPK, ndërsa në tetor pritet që të rinisin përzgjedhjet e emrave të rinj që do t’i nënshtrohen vetingut. Pra, shtatori do të jetë muaji ku Komisioni i Pavarur i Kualifikimit pritet të mbyllë “skanimin” për të gjithë kandidatët e SPAK, çka nënkupton se në tetor kjo strukturë e re do të jetë gati dhe do të marrë jetë.
Puna e KPK me kandidatët e SPAK
Muajt qershor dhe korrik ishin mjaft të ngarkuar për Komisionin i Pavarur i Kualifikimit, i cili kaloi me sukses në “sitë” thuajse të gjithë kandidatët për në Prokurorinë e Posaçme Antikorrupsion. KPK i kanë mbetur pa rivlerësuar edhe 5 prokurorë kandidatë, nga 25 që kishin shfaqur interes. Anton Martini, Elisabeta Imeraj, Doloreza Musabelliu, Ndini Tavani dhe Anita Jella janë të vetmit që nuk janë vetuar akoma. Nga ana tjetër, KPK ka kryer punë edhe me gjyqtarët që kandidojnë për në Gjykatën e Posaçme Antikorrupsion. Gjatë këtyre muajve kanë kaluar në veting disa gjyqtarë të Krimeve të Rënda dhe të Apelit, nga ku mund të përmendim Saida Dollanin, Idriz Mulkurtin, Dhimitër Larën, Sokol Binajn, Albana Boksin, Fehmi Petkun, etj. Duhet theksuar fakti se nga kandidatët gjyqtarë për SPAK janë rivlerësuar gati gjysma e tyre, çka do të thotë se në shtator komisionerët e vetingut do të fokusohen tek ky proces me qëllim që të mos ketë më asnjë vonesë. Më pas, në tetor pritet të rifillojë normalisht procedura e hedhjes të shortit, për të gjetur emra të rinj që do të përballen me sfidën e vetingut. /Mimoza Ibra
