Parlamenti Europian është mbërthyer dje nga debatet për Shqipërinë dhe Maqedoninë e Veriut. Dje u diskutua rezoluta e depozituar pak ditë më parë, ku kritikohet refuzimi i negociatave.
Duke qenë se PE pritet të votoj sot këtë rezolutë e cila është e jashtëzakonshme , për arsye se kërkon që BE të rihapë procesin e negociatave, seanca e djeshme në PE u shoqërua me debate të shumta. Gjatë fjalës së saj, ministrja për Çështjet Evropiane, Tytti Tuppuraine, shprehu vlerësim për Maqedoninë e Veriut për marrëveshjen për emrin, duke e ndryshuar atë. Ndërkohë, komisioneri për Zgjerimin Johanes Hahn pohoi se vendet e Bashkimit Europian duhet të qartësojnë sa serioz janë për integrimin.
Mes të tjerash ai theksoi se Komisioni Europian do të vazhdojë të mbështesë Shqipërinë dhe Maqedoninë e Veriut. Kritik ndaj vendimit të BE-së ishte edhe nga një prej përfaqësuesve të Partive Popullore Europiane, që u shpreh i zhgënjyer për mos-hapjen e negociatave. “Shumë të zhgënjyer që s’u hapën negociatat. S’mund të presim deri në samitin e Zagrebit, duhet ta rregullojmë këtë gabim të bërë. BE të rifitojë besimin e shqiptarëve. Shqipëria dhe Maqedonia e Veriut duhet të vijojë reformat”, tha ai. Grupet Parlamentare të Parlamentit Europian kanë depozituar mocionet e tyre mbi draftrezolutën për fillimin e bisedimeve për anëtarësim të Shqipërisë dhe Maqedonisë së Veriut. Vendet anëtarë të BE kanë dalë dje njëzëri kundër Francës, e cila bllokoi integrimin e Shqipërisë në BE. Ajo që vihet re në mocionet e depozituara është zhgënjimi i grupeve të mëdha të PE, nga shtyrja e vendimit për hapjen e negociatave me Shqipërinë dhe Maqedoninë e Veriut.
Ky bllokim i negociatave është parë po ashtu si një pengesë, pasi minon reformat. Në mocionin e Grupit të Partive Popullore Europiane janë evidentuar pasojat negative në besueshmërinë e politikës së zgjerimit, e cila minon në mënyrë të drejtpërdrejtë reformat e thella të ndërmarra nga dy vendet kandidate, që janë Shqipëria dhe Maqedonia e Veriut. Po ashtu diçka tjetër që vërehet me shqetësim në mocionet e depozituara nga grupet më të rëndësishme, është se vendimi i Këshillit Europian i dërgon një sinjal të rrezikshëm vendeve të rajonit dhe lë hapësira për influenca nga aktorë të tjerë. “Këshilli europian të marrë përgjegjësinë e tij dhe më në fund të veprojë në përputhje me angazhimet e veta; dënon çdo vendim që dobëson angazhimet e BE-së për Maqedoninë e Veriut dhe Shqipërinë”, kërkojnë grupet më të mëdha parlamentare.
Vendet anëtarë në mbështetje të Shqipërisë
Në mocionet e depozituara nga grupet e rëndësishme politike në Parlamentin Europian, theksohet më së miri fakti se Shqipëria dhe Maqedonia e Veriut i kanë plotësuar kushtet e vendosura nga Këshilli vitin e kaluar. Edhe Grupi i tretë më i madh në PE “Renew Europe” ku bën pjesë partia e Presidentit Macron apo e Kryeministrit holandez Rutte, kanë vlerësuar pozitivisht hapat dhe reformat e ndërmarra nga Shqipëria dhe Maqedoni e Veriut. Ndërkohë edhe tre grupet e tjera “të majtët e bashkuar”, “të gjelbrit” dhe “konservatorët”, të cilët janë opozita, nuk kanë votuar në Komisionin Europian, janë edhe më të ashpër në reagimin e tyre ndaj gabimit historik të Këshillit Europian. Ata e cilësojnë mos hapjen e negociatave me Shqipërinë dhe Maqedoninë e Veriut si një gabim historik, tek sa theksojnë rëndësinë strategjike për BE të Ballkanit Perëndimor.
Vetëm një zë kundër
Nga të gjithë këta zëra që kanë dalë kundër vendimit të BE për të shtyrë negociatat, kësisoj kanë mbrojtur dy vendet anëtarë Shqipërinë dhe Maqedoninë e Veriut, ka pasur vetëm një grup që kanë dalë kundër. Ka qenë grupi i “Identitetit dhe Demokracisë”, i themeluar nga Le Pen, ku aktualisht bën pjesë edhe AFD gjermane ka depozituar një mocion, që nuk ka shanse të miratohet, dhe janë të vetmit që kanë përshëndetur mosvendimin e Këshillit Europian, duke dalë kështu kundër integrimit të Shqipërisë në BE. Ndërkohë i vetmi grupim që ka dalë kundër linjës së vendeve anëtarë, që është grupi i “Identitetit dhe Demokracisë”, ka argumentuar në të njëjtën linjë me opozitës jashtëparlamentare në Shqipëri. Ndërkohë që PPE ka shprehur qartë qëndrimin e saj pro rrugëtimit Europian të Shqipërisë në mocionin për rezolutën për fillimin e bisedimeve për anëtarësim të Shqipërisë dhe Maqedonisë së Veriut me BE, e depozituar pranë Parlamentit Europian. /Arbjona ÇIBUKU
