Edhe pse kemi hyrë në stinën e nxehtë të verës dhe pushimeve, sekush çdo ditë promovon atraksionet turistike të Shqipërisë gjatë vizitave që bën, presidenti Ilir Meta nuk ka lënë pas dore as qokat dhe shpërndarjet në masë të dekoratave.
Në harkun kohor të tre ditëve presidenti Meta ka nxjerrë nga “thesi” i dekoratave disa të tilla, të cilat i ka ndarë për shkolla 9-vjeçare, gjimnaze dhe volejbollistët.
Rasti më i freskët ka ndodhur ditën e djeshme, ku përmes një statusi në rrjetet sociale zoti Meta zbuloi se me anë të një ceremonie solemne të organizuar në qytetin e Sarandës, vlerësoi tre volejbollistë të shquar të “Butrintit” dhe ekipit kombëtar.
Kështu, me Titullin “Mjeshtër i Madh” u dekoruan volejbollistët: Z. Kostaq Stefani “Në shenjë vlerësimi për kontributin e dhënë në sportin e volejbollit, si sportist i dalluar i ekipit “Butrinti”, “Partizani” dhe Ekipit Kombëtar; Z. Orest Lepuri “Në shenjë vlerësimi për pasionin dhe karrierën e suksesshme si lojtar dhe trajner i volejbollit të skuadrës “Butrinti” të Sarandës.
Ndërsa me titullin “Naim Frashëri” u vlerësua zoti Janaq Zhaka “Për pasionin, përkushtimin dhe karrierën e suksesshme si lojtar i volejbollit të skuadrës “Butrinti” të Sarandës. I dalluar për lojën dhe korrektësinë e tij në fushën e lojës”.
Ndërkohë, sipas një verifikimi të gazetës, rezulton se presidenti Ilir Meta në tre ditë me radhë ka dekoruar shkollën 9-vjeçare “Adem Sheme”, gjimnazin “Hasan Tahsini”, dje një bankier që kishte qëndruar heroikisht në mbrojtje të bankës në vitin 1997, Andon Vasilin, ndërsa dje dekoroi tre volejbollistët e “Butrintit.
Kështu që, kush ka dyshime, le të hyjë në adresën zyrtare të presidentit në Facebook! Mister mbetet fakti se sa ditë do të qëndrojë Ilir Meta në Sarandë, pasi ka me vete “thesin” e dekoratave, duke sjellë gëzim në këtë qytet bregdetar, pasi siç e ka nisur gjysma e qytetit do dekorohet.
