Sekretari Amerikan i Shtetit Rex Tillerson i ka dhënë “plotfuqi” edhe më të përforcuar ambasadorit në Tiranë, Donald Lu, si dhe diplomatëve në Kosovë dhe Maqedoni për të vijuar operacionin për pastrimin e politikës nga të korruptuarit.
Tillerson ka zhvilluar me Lu-në në Ankara një takim të veçantë, takim i cili është publikuar edhe në faqen e ambasadës amerikane.
Takimi ka ndodhur pikërisht pas vendimit të Sekretarit Amerikan të Shtetit për të futur në “listën e zezë” ish-kryeprokurorin Adriatik Llalla.
Siç mësohet, Lu dhe Tillerson kanë folur për të gjitha skenaret e mundshme që mund të ndodhin, nëse kundërshtarët e reformës në drejtësi do të tentojnë të bllokojnë situatën.
Siç mësohet janë marrë parasysh të gjitha planet siç ndodhi në dhjetor me Arta Markun.
Kryeprokurorja e përkohshme ishte “plani B” ngaqë u vonua dhe bllokua për më shumë se 1 vit procesi i vetingut, i cili hyri në impas pas instalimit të çadrës.
Donald Lu ka bërë të ditur se ka kërkuar që të qëndrojë edhe një vit shtesë në Shqipëri, ndërkohë që ka shprehur dëshirën që të qëndrojë në Shqipëri, edhe pas përfundimit të misionit diplomatik.
Çka nënkuptohet se një mission tjetër do të kryejë Lu-ja në Shqipëri.
Sipas gjasave do të marrë pjesë në Misionin Ndërkombëtar të Monitorimit. Pra do të qëndrojë “gozhdë” deri sa të largojë të korruptuarin më të fundit nga politika.
Tillerson, i cili ka zhvilluar një vizitë zyrtare në Turqi, ka thirrur në Ankara ambasadorët amerikanë të akredituar në Ballkan, Kaukazin Jugor dhe Mesdhdheun Lindor.
Kanë qenë ndër ta edhe ambasadori amerikan në Tiranë, Donald Lu; ai në Kosovë, Greg Delavvie dhe ambasadori amerikan në Shkup, Jess Baily.
Është e rëndësishme theksimi i emrave të këtyre të treve, pasi që prej më shumë se një viti, disa qarqe në Ballkan i kanë cilësuar dhe vazhdojnë t’i cilësojnë si “njerëz të Sorosit” që do të shkarkohen nga Trump.
Mirëpo përkundrazi, vetë Sekretari i Shtetit i SHBA-së, ka thirrur në Ankara Donald Lu-në, pikërisht pas vendimit që mori për të futur në “listën e zezë” Adriatik Llallën, ish-kryeprokurorin shqiptar.
Takimi i Ankarasë është në fakt, niveli më i lartë i samiteve publike të Tillerson me ambasadorët e tij në Ballkan.
Në verë, një “samit të tillë” e mbajti në Sarajevë, Hoyt Brian Yee, i cili u komandua nga Tillerson për të menaxhuar Ballkanin pas dorëheqjes së Victoria Nuland.
Pas suksesit që arriti Hoyt Yee me largimin e rusëve nga Maqedonia, Shqipëria, Kosova. dhe ka punuar fort për ta kryer këtë edhe në Serbi, tani Tillerson ka ndërmarrë një aksion më agresiv.
Ai do ta largojë apo dobësojë ndikimin rus jo vetëm në Ballkan, por edhe në Kaukazin e Jugut, ku ndodhen shtete që kanë probleme me Moskën, por gjendja ekonomike i kanë bërë që të fitojnë qeveritë proruse.
Pra në një farë mënyre, Uashingtoni po vendos vijat e tij të influencës para një “Jalte të Re” siç ka kërkuar Putin, pra një ndarje të zonave./Pamfleti.com
