Radhën për t’u përballur me vettingun e ka një tjetër anëtar i Gjykatës së Lartë. Gjyqtari Tom Ndreca do të dalë përpara Komisionit të Pavarur të Kualifikimit më 13 korrik, kur do të jetë edhe seanca dëgjimore. Trupa gjykuese përbëhet nga Brunilda Bekteshi, Roland Ilia dhe Firdes Shuli.
Ndreca është një emër i njohur i drejtësisë për opinionin publik dhe mediat. Ai ka qenë relator i çështjes “Tahiri” për bllokimin e pasaportës.
Po ashtu ka qenë edhe gjykatësi që kryesoi në Kolegj Zgjedhor çështjen e numërimit të votave në Tiranë, duke rrëzuar kërkesë-padinë e PS-së, për shpalljen të pavlefshëm të vendimit të KQZ, për numërimin e votave hedhur në kutinë e gabuar, vendim që nxori fitues të garës për bashkinë e Tiranës, Lulzim Bashën.
