Shqipëria është shndërruar në vend tranzit për kalimin e klandestinëve që vijnë nga Lindja e Mesme dhe Afrika e Veriut.
Fluksi i emigrantëve po shfrytëzohet edhe nga trafikantët që i ndihmojnë të kalojnë kufijtë kundrejt parave.
Policia e Shkodrës ka zbuluar një grup personash që transportonin klandestinët nga kufijtë jugorë të vendit drejt territorit malazez, me destinacion final vendet e Bashkimit Evropian.
Në kuadër të operacionit të koduar “Wrong way”, uniformat blu kanë vënë në pranga katër persona, konkretisht Bashkim Alijaj, 35 vjeç, banues në Tiranë, Halil Hafuzi, 43 vjeç, banues në Tiranë, Gentjan Boçku, 43 vjeç, banues në Bathore dhe
Adem Çela, 32 vjeç, banues po në Bathore, Tiranë.
Arrestimi i tyre u bë pasi në hyrje të qytetit në lagjen “Bahçallek” të Shkodrës, u kapën duke transportuar 15 shtetas të huaj me qëllim kalimin e tyre nga Shqipëria nëpërmjet kufirit të gjelbër drejt Malit të Zi, e më pas destinacion final kishin vendet e BE.
Në kuadër të këtij operacioni u sekuestruan 4 automjetet me të cilat po bënin transportimin e shtetasve të huaj./a.m./noa.al/
