Gjykata e Espo në Finlandë ka dënuar me burg një bandë shqiptare, që akuzohej për veprat penale të trafikut të drogës, armëmbajtjes pa leje dhe vrasjeve të mbetura në tentativë. Drejtësia finlandeze ka dënuar me 9 vite burg 32-vjeçarin Besnik Shehu, i cili akuzohet për 16.5 kg kanabis dhe 2.7 kg kokainë, të cilën e shpërndante në Suedi.
Shqiptari tjetër i bandës, 29-vjeçari Albano Dzurkova, është dënuar me 7 vite burgim për 16.5 kg kanabis dhe 3.6 kg kokainë. Ky shtetas akuzohej dhe për armëmbajtje pa leje, por përfitoi ulje dënimi, pasi pranoi të bashkëpunojë me autoritetet gjatë hetimeve, të cilat kanë nisur prej pranverës së vitit 2017.
4.6 vite burg do të vuajë 27-vjeçari Xhildo Kolaj për 16.5 kg kanabis dhe 200 gramë kokainë, si dhe armëmbajtje pa leje. Edhe ky i fundit bashkëpunoi me hetuesit, duke përfituar ulje dënimi.
Tre shqiptarët e tjerë, emrat e të cilëve nuk janë publikuar në mediat finlandeze, janë dënuar me rreth dy vite burgim, ndërsa një person tjetër është lënë i lirë, pasi gjykata ka rrëzuar akuzat ndaj tij. Përveç dënimit me burg, banda kriminale e shqiptarëve do të duhet t’i shlyejë shtetit dhe një gjobë prej 234 mijë euro kompensim.
