Pas një lufte të gjatë duket se po shkojmë drejt triumfit ndaj COVID. Pas 244 ditësh në pandemi, për herë të parë sot nuk është shënuar asnjë humbje jete nga COVID.
Lajmin e mirë e ka bërë me dije ministrja e Shëndetësisë Ogerta Manastirliu në rrjete sociale. Që nga fillim i pandemisë në vendin tonë kanë ndërruar jetë 2,447 persona nga COVID.
E pranishme gjatë procesit të vaksinimit për punonjësit e transportit publik, Manastirliu deklaroi se nesër mblidhet Komiteti Teknik i Ekspertëve për lehtësimin e masave. Ndërkaq ministria e Shëndetësisë bën me dije se nga 2,691 testime janë shënuar 15 raste të reja në 24 orët e fundit.
“Rastet pozitive të konfirmuara janë identifikuar në këto bashki: 5 raste në Tiranë, 2 raste në Berat, Skrapar, 1 rast në Shkodër, Durrës, Fier, Devoll, Mat, Shijak”, thotë ministria.
Aktualisht në spitalet COVID po trajtohen 43 pacientë nga të cilët 7 pacientë janë në terapi intensive. Në 24 orët e fundit janë shëruar 71 qytetarë, duke e çuar numrin e të shëruarve në 128,978 që nga fillimi i epidemisë.
Pavarësisht se situata po shkon drejt normalizimit, ministria e Shëndetësisë dhe Mbrojtjes Sociale ju bën apel qytetarëve të mos e ulin vigjilencën dhe të vijojnë të zbatojnë rregullat për parandalimin e COVID19.
“Ministria e Shëndetësisë u drejtohet qytetarëve të mos neglizhojnë asnjë shenjë të sëmundjes dhe të kontaktojnë për çdo dyshim me mjekun e familjes për të kryer testimin si dhe për ndjekjen dhe trajtimin ambulator në banesë. Telefononi në numri 127 të Urgjencës Kombëtare për çdo emergjencë apo referim në spital”.
