Avokati i Izet Haxhisë, Bashkim Nikolla në një intervistë për “Dita” tregon se ballafaqimi në sallën e gjyqit midis Sali Berishës dhe ish-truprojes së tij do të jetë surpriza e madhe e këtij gjyqi që pritet të nisë në shtator.
“Unë i kuptoj shumë mirë të gjithë ata që janë dyshues nëse do të vijë apo jo Saliu në sallën e gjyqit. Unë shpreha një bindje timen si avokat dhe e përsëris: Ai do të vijë dhe duhet të vijë për shumë arsye. Ai do të vijë, nëse i ka mbetur pak burrëri për të provuar gjithë ato akuza që ka hedhur ndaj kundërshtarëve të tij për njëzet vjet me radhë, përfshi edhe klientin tim Izet Haxhia.
Ai duhet të vijë si njeri dhe si politikan që ka mbajtur postet më të larta në shtet. Ai duhet të vijë për të shpëtuar nderin dhe dinjitetin e tij. Sepse edhe ai është akuzuar për vrasjen e deputetit Hajdari dhe ka shumë dyshime si pjesëmarrës në vrasje. Këto dyshime janë thënë qartë edhe në librin “Izet Haxhia përballë Sali Berishës”.
Në të kundërt ai do të provohej se është fajtor në sytë e një opinioni të tërë. Kjo do të përbënte një risk të madh, një risk i marrë përsipër nga ana e tij sepse mendoj se është rasti me ideal ku ai do të shpjegonte çdo pikëpyetje, dyshimeve apo akuzave të shumta të bëra në adresë të tij.
Dhe më në fund ai ka shansin e artë për të kryer një përballje dinjitoze me të vërtetën dhe vetëm të vërtetën. Çdo qëndrim i kundërt i tij për mos paraqitje përpara gjykatës do të ishte fatal për të, pasi do të ishte shumë e vështirë të dilte para sovranit i pastër si e vërteta ose si e drejta”, shprehet avokati.
Ai thotë se ky moment do të tregojë para shqiptarëve se ka nisur një epokë e re në drejtësinë shqiptare.
“Ka perënduar ajo kohë. Unë besoj se ka ardhur kohë tjetër dhe kjo mendoj se do të provohet së shpejti. Ky gjyq që po përgatit do të jetë edhe një gur prove për drejtësinë e re shqiptare”, thotë Nikolla.
I pyetur nëse mund të konsiderohet fajtor Berisha, se ka nxjerrë Azemin në pritë në natën fatale të 12 shtatorit 1998 ai përgjigjet: “Besoj se kjo do të provohet. Janë shumë pikëpyetje që lindin gjatë shqyrtimit me vëmendje të dosjes. Vrasja e Azem Hajdarit është një vrasje e paralajmëruar. Jo vetëm se atij i janë bërë edhe atentate të tjera më përpara, por ne kemi siguruar prova të reja. Natyrisht për këtë duhet dëshmia e Berishës, por edhe të tjerëve të përfshirë në këtë çështje.
Historia e vrasjes së Azemit as nuk nisi dhe as nuk u bitis atë ditë që ai u godit. Në ditarin e 3 Qershor 1998, të mbajtur nga ish ministri i Brendshëm Perikli Teta, citohet: “Mbrëmë në Ambasadën Italiane takova Azem Hajdarin dhe i thashë të mos shkonte sot në Tropojë. Më tej ora 9.50 të po kësaj date, pasi bisedova me ÇANON, i thashë Pjerinit të shkojë tek trageti dhe të ndalojë Azemin… Ora 15.50 Pjerini tha “nuk pranon”.
Në Tropojë komisari i policisë kërkoi që Azemi të mos vijë pasi ka informacion se mund ta vrasin… Ora 22.30 Çano njofton se Azemi është brenda në këshillin e rrethit dhe nuk del dot, pasi persona të pa identifikuar qarkullojnë me automjete dhe armë…”
Të bën përshtypje se në vijimësi deri në ngjarjet e 12 shtatorit 1998, në ditarin e ish ministrit të brendshëm Perikli Teta nuk kishte asnjë shënim apo shqetësim për kërcënim jete për deputetin Azem Hajdari.”
Ai thekson se provat nuk “vjetërsohen” asnjëherë dhe se ato do t’i nënshtrohen një rishqyrtimi gjyqësor penal në lidhje dhe në harmoni me provat e reja që do të sjell në proces Izet Haxhia, për të hedhur dritë mbi të vërtetën dhe pozicionin juridik penal të tij në atë proces.
