Gjykata e Tiranës, ka dënuar sot për shpifje, ish-juristin e CEZ, Romeo Kara, i cili ishte paditur nga djali i ish-kryeministrit Sali Berisha, Shkëlzen Berisha. Ky i fundi e paditi për shpifje dhe gjykata ka vendosur sot të dënojë me 50 mijë lekë gjobë Romeo Kara. Në një reagim për “Pamfleti”, juristi Kara tregon prapaskenat e këtij vendimi, cili është synimi i klanit Berisha dhe dy standardet e gjykimit në sistemin e drejtësisë.
Zoti Kara për herë të dytë ju dënoheni për “shpifje” ndaj Shkëlzen Berishës. Më shumë sesa një betejë me familjen Berisha duket se sot betja është e hapur me gjykatat. Çfarë mund të thoni për këtë?
Po është shumë e vërtetë dhe besoj se do të dënohem përseri nga gjykata, pasi mos qofshin dy pa tre. Ështe edhe një tjeter akuzë e djalit të Berishës qe po gjykohet nga gjykata, dhe nuk do të çuditesha që gjykata të vazhdojë t’i mbaje ison Berishës. Ju thoni që tashmë unë e kam betejën me gjykatat më shume sesa me Berishën. Jo, do të thoja unë, beteja vazhdon me Berishën, me personin e kallëzuar penalisht tre herë nga une, dy herë per korrupsion në shuma stratosferike dhe një herë për thirrje për armatosje dhe përmbysje të qeverisë së zgjedhur me dhunë.
Gjykatat, janë pjesë reale, organike të sistemit kriminal Berisha të krijuara me shumë kujdes dhe vëmendje nga ai, të mbushura me njerëz të afërt të tij, sipas një perzgjedhjeje të veçantë, të cilët i kanë krijuar të gjithe garancinë Berishës për të bërë zullumet që ka bërë, si dhe për të luftuar dhe dënuar të gjithë kundërshtarët e tij dhe sidomos njerëzit problematikë si unë.
Pra, përballjen tashmë prej mbi dy vitesh Berisha po e bën duke përdorur bandën e tij të prokuroreve dhe gjyqtarëve. Kërkova me prova e fakte, që ky gjyqtar të përjashtohej nga gjykimi, pasi është “pjelle e klanit Berisha”, por kërkesa ime u hodh poshtë, pikërisht nga një tjetër “pjellë e Berishës”, nga gjyqtari Ahmet Metaliaj. Verifikoni me kujdes gjyqtarët dhe do të shihni sesa në mënyrë të frikshme Berisha i kontrollon ata. Këta gjyqtarë janë pikërisht arma më e fortë e Berishës dhe e gjithë së keqes që na ka pllakosur, duke vrarë çdo shpresë se në këtë vend mund të kete një ditë drejtësi.
Unë praktikisht u gjykova nga Berisha dhe e përgëzoj Berishën për vendimin e marrë. Bravo Sali, se edhe njëherë më dhe të drejtë, duke e keqpërdorur aq shumë gjykatën sa ke bëre që ky vendim, të krijojë teresisht efektin e kundërt të asaj çfarë ke shpresuar!
Pra edhe një herë duhet theksuar se Berisha është një sistem, pikërisht ky sistem kriminal e mafioz që po mban peng Shqipërinë dhe çdo kundërvenie ndaj tij, detyrimisht të bën që të perballesh edhe me pjesën më të ligë të këtij sistemi, që janë gjykatat.
Deklaroheni fajtor për një deklaratë të huazuar dhe përsëri shpalleni fajtor… Sa profesional është ky vendim?
Herën e parë jam dënuar për një deklarate të huazuar, ndërsa tani jam dënuar për një opinion timin lidhur me një vizitë të përbashkët të Shkëlzen Berishës dhe Kastriot Ismailajt në Pragë në fundvitin 2010. Kjo vizitë u zbulua nga verifimikimet e sistemit TIMS nga Komisioni Hetimor Parlamentar Balla dhe unë bëra komentet e mia lidhur përsa më sipër. Sot është herezi ta mendosh që të dënosh dikë pse ai jep një opinion.
Këto lloj dënimesh, realisht mohojnë lirinë e shprehjes dhe të mendimit, bien në kundërshtim total me të gjitha konventat që mbrojnë të drejtat e njeriut dhe përgjithesisht hidhen poshtë nga gjykata e Strasburgut. Unë do ta fitoj betejën me Berishën, si dhe me të gjithe klanin e tij kriminal, qofshin ato me apo pa togë gjyqtari, biznesmeni, krimineli, prokurori, polici, deputeti etj. Berisha nuk mund t’i përdorë këto dënime për të zhvleresuar paditë e mia. Këtë ta harrojë Berisha!
Të përdorësh këto denime do të thote të fshihesh pas gishtit, prandaj unë nuk i marr seriozisht këto dënime. Unë e kam sfiduar Berishën dhe gjyqtarin e tij, duke paraqitur si argument mbrojtës pikërisht ato argumente që Berisha vetë ka përdorur në disa raste në Gjykatën e Lartë për t’u mbrojtur, prej nga ku doli si i pafajshëm. E turpshme dhe skandaloze sesi për të njëjtën lloj çështjesh me të njëtat argumenta, Berisha del i pafajshëm, ndërsa unë i fajshëm. Me këtë mjet që unë përdora arrita ta prezantoj përfundimisht gjyqtarin e çështjes si një vegel pa integritet, tërësisht të njëanshem dhe të papranueshëm për të qenë në detyrën e gjyqtarit. Ky gjyqtar parodist vetëm profesionist nuk është, dhe besoj se do të përgjigjet një dite për guximin që mori për të më mohuar një të drejtë themelore: pasjen e një gjykimi të drejtë. Këtë të drejtë që anglezet e saksionuan që në vitin 1207 me Magna Carta, ma mohoi ky gjyqtar në vitin 2019, sepse ai përpara ligjit njeh Berishën, sepse eshte aty ku është, vetëm prej Berishës. Megjithatë, këtë gjyqtar tashmë e shoh si një mjeran, që nuk ka as lirinë të ushtrojë i pavarur profesionin e tij.
Thellë-thellë ai ka mohuar diçka nga vetja, për të permbushur urdhërat e padronit, i cili besoj se nuk i ka lënë alternative tjetër.
Ju keni deklaruar se “edhe sikur t’a paguaj me jeten time, unë e siguroj tufen Berisha se kurrë nuk do të tërhiqem”. Si do t’ja arrini me një kundërvënie të tillë ndaj jush?
Po t’i shohësh opinionet për të cilat unë jam shpallur fajtor kupton se unë i kam pasur bindje ato dhe jo spekulim. Pikërisht për ngjarjet e fundvitit 2010, unë kam kallezuar penalisht në tetor 2017, Sali Berishen dhe Ilir Metën, së bashku me disa persona të tjerë, që kanë konsumuar disa vepra penale me pasoja të rënda financiare për vendin. Ky kallëzim ndodhet në prokurorinë e Krimeve të Rënda dhe une kam ofruar provat dhe deklarimet e mia në mbeshtetje të kallëzimit. Gjyqtari gjyhnaqar i Berishës më shpall të fajshëm për ato fakte që une kam bërë kallezim dhe qe janë në proces. Kjo është terësisht qesharake.
Berisha mendon se nesër do godasë nëpër procese gjyqësore dëshmite e mia si të pabesueshme, se medemek unë jam shpallur fajtor për shpifje. Kaq mund të bëjë Berisha dhe kaq po bën. Kurrë Berishajt, i madhi dhe i vogli, nuk kanë diskutuar lidhur me akuzat e mia.
Kurrë gjuha e gjatë e tyre, që nuk le vend pa u futur dhe llaf pa thëne, nuk ka hedhur poshtë qoftë edhe një nga provat, faktet apo perfundimet e investigimeve të mia. Ata menduan se do lodhesha apo do rrëzohesha brenda disa muajsh, por i bënë hesapet gabim.
Edhe pse gjykata dhe prokuroria nuk po bëjnë punëne tyre, unë perseri do të vazhdoj në rrugen time. Kurre nuk ia kam lejuar vetes përuljen ndaj të padrejtëve dhe sidomos ndaj keqbërësve, qofshin këta edhe pushtetarë.
Vetes nuk i kam lejuar asnjë alternativë tjetër, përveçse përballjen me këdo që na vodhi vitet më të bukura të jetës, na mohuan drejtësinë dhe po na detyrojnë të leme edhe vendin.
Berisha dhe sistemi i tij duhen rrëzuar, pasurimi nëpërmjet politikës duhet të marre fund, zullumqarët që krekosen të mbyllen nëper burgje, pasuria e tyre të konfiskohet dhe t’i hapet rrugë sa me shpejt ndërtimit të shtetit të së drejtes ku njerezit të vleresohen nga devotshmeria karshi atdheut dhe jo asaj karshi partisë apo liderit.
