Një ditë pasi në Unazën të Re u shënua përplasja e ashpër mes forcave të policisë dhe banorëve të zonës dhe që kundërshtojnë prishjen e shtëpive për ndërtimin e unazës, gjendja paraqitet e qetë, por pamja pas shembjes së godinave është e trishtueshme.
Pasojat duket se i ka ndjerë më së shumti familja Billa, banesa e së cilës ishte në rrugën Teodor Keko, pranë rrethrrotullimit të Doganës së Tiranës. 19 anëtarët e saj kanë kaluar natën e parë në qiell të hapur.
Haxhi Billa 78 vjeç, duket më shumë se i dëshpëruar. Ai thotë se tokën e ka marrë me ligjin 7501 dhe lejen e ndërtimit nga ish kreu i Bashkisë së Tiranës, Sali Kelmendi me shume se dy dekada me pare.
Shkatërrimi i banesës ka qenë i befasishëm. IKMT nuk ka ndërprerë energjinë elektrike dhe tubacionin e ujit të pijshëm.
Më të traumatizuarit nga kjo histori që ka një vit që ka nisur intensivisht, janë të vegjlit e familjes Billa.
Një prej tyre thotë se ka shpëtuar vetëm librat e shkollës. Dëshpërimi shihet edhe tek gratë e shtëpisë. Një prej tyre thotë se tashmë nuk kanë ku dhe me se të gatuajnë apo të kryejnë nevojat personale.
Në zonë shihen gërmadhat, me dhjetëra metër kub inerte. Ndonjë “punëtor” po merret me hekurishtet që kanë mbetur pas shembjes së objekteve.
Forcat e policisë dje të shumta në numër nuk janë. Edhe INUK nuk është më aty për të pastruar vendin kur dikur ishin 33 objekte. Sipas të dhënave zyrtare, puna do vijojë sërish me prishje të tjera, ndërsa banorët, të cilëve do u shemben shtëpitë, apo njësitë e shërbimeve, shumë shpejt do të duhet të “braktisin“ lagjen ku kanë jetuar e punuar prej më shumë se 20-vitesh.
