Kreu i Bashkisë së Tiranës Erion Veliaj është treguar shumë i ashpër në reagimin e tij sot, veçanërisht për protestën e banorëve të Astirit që rrezikojnë të mbeten pa shtëpi.
Veliaj tha se këta persona duhet ta nisin nga zero, njësoj siç bëjnë studentët, po kreu i Bashkisë injoron faktin se një pjesë e banorëve janë goxha në moshë. Madje në protestat e përditshme kanë qenë pjesë dhe disa gra të moshuara, të cilat janë shprehur se e kanë të pamundur që ta nisin nga zero në vitin 2018.
“Sot dëgjova njerëz që unë e di shumë mirë ku e ka shtëpinë, ai Gjyzi nuk e ka fare shtëpinë aty, bën cirk se një kryetar partie po i afrohet disfatave, Luli është një kalama i llastuar pse me atë do merremi ne. Dikush që nuk ka rrënjë në këtë qytet, kujt i sulet? Për 28 vite nuk kanë paguar asnjë taksë ata që janë pa letra. Shanset janë zero që kjo betejë të ndalet. 99% e njerëzve duan që qyteti të zhvillohet, të rregullohet trafiku”- tha ai.
“Kush është me letra pronë do i marri kokërr më kokërr, kush ka bërë lavazh i ra qylit 28 vjet tani do bëhet rruga. Kush ka bërë karabina 8 kate dhe të ketë letra, do ia japim. Ca është pa letra prapë, do u japim bonusin e qirasë. Kemi ofruar tre vite qiranë, për ata që nuk kanë asnjë letër që kanë zaptuar tokën e dikujt tjetër në gjurmën e unazës.
Pse çdo njeri që erdhi në Tiranë kapi një tokë? Jo mo, si gjithë të tjerët. Si mund të jenë kaq hajvanë që mendojnë se fitojnë vota duke bllokuar. Njerëzit nuk janë më budallenj, nuk hanë më bar. Eksperienca na tregon që aty ku u bë rruga te Komuna e Parisit aty super fitoi PS, nuk ka sens”- tha më tej Veliaj.
