Kryebashkiaku Erion Veliaj ka reaguar sërish sot në lidhje me vendimin e qeverisë për ti kaluar në administrim Bashkisë së Tiranës Kopshtin Botanik.
Nëpërmjet një komenti në rrjetet sociale Veliaj sjell në vëmendje se një pjesë e protestuesve janë sërish të njëjtët me ata që protestuan para pak muajsh edhe kundër ndërtimit të shkollës 9 vjeçare të integruar “Nënë Tereza” në Kodër Kamzë.
Ai publikon një shkrim që flet pikërisht për shkollën e re “Nënë Tereza” që ka nisur të marrë formë, ndërsa thekson se edhe ata që protestojnë sot kundër vendimit për Kopshtin Botanik do të kenë të njëjtin fat me ata që protestuan para pak muajsh edhe për shkollën.
“Mynyri dhe banda qesharake kundër Botanikut të hapin sytë e të mos ndjekin dhëndurët e Saliut që kundërshtonin shkollën “Nënë Tereza” tek UBT në Kodër Kamëz – ose do kenë të njëjtin fat si kolegët e tij aty – TURPIN në fund të karrierës”, shkruan kryetari i Bashkisë së Tiranës, Erion Veliaj në një koment të tijin në rrjetet sociale.
Bashkia e Tiranës ka bërë të qartë se te Kopshti Botanik nuk do ketë asnjë ndërtim dhe se vendimi për kalimin e tij në administrim të saj, do të bëj të mundur transformimin e tij në një hapësirë të denjë për studentët dhe studiuesit, si dhe për qytetarët.
