Shqipëria A duke kryesuar grupin dhe Shqipëria U-21 po në vendin e parë! Jemi në vitin 2023, për herë të parë kuqezinjtë kanë arritur që jo vetëm të përmbushin pritshmëritë e tifozëve, por edhe ta tejkalojnë atë.
Një histori e dalë dhe e fryrë nga FFK ishte ajo sa i përket lojtarëve shqiptarë të Kosovës që vijnë te Shqipëria. Përtej anormalitetit, ajo që vret më shumë është fakti se Shqipëria është kaq shumë pranë historisë dhe në këtë moment, duhet të diskutojmë për ndasi të tilla kur jemi në pikën më kritike, që duhej të ishim më të bashkuar se kurrë.
Gjithashtu një tjetër histori është edhe ajo e biletave të Kombëtares. Rreth 300.000 tifozë kanë hyrë në ëebin e shitjes së biletave duke i avulluar ato në fare pak kohë. Jo pak diskutime dhe reagime negative kanë ardhur sa i përket tregut të zi dhe paragjykimeve të zakonshme që nisin nga shqiptarët.
Por “Sport Ekspres” kërkon që në këtë moment, të zbardh një pjesë të shkurtër të një bisede me një prej tifozëve më të flaktë të Kombëtares, që e ndjek atë edhe kur nuk është mirë, por pa zbuluar identitetin e tij.
“Vetëm Shqipëria të fitojë dhe të vazhdojë kështu, por nuk dua fare bileta më. Mjafton që Shqipëria të fitojë, ka boll tifozë”. Ishte një pohim shumë domethënës, një tifoz i vërtetë i Kombëtares, që e ndjek atë në çdo moment, e di shumë mirë se nuk është ky momenti për të krijuar polemika rreth pranisë të një personi apo një tjetri në stadium. E të tjerë që kërkojnë të ngrenë diskutime mbi një çështje të tillë, janë ata që e ndjekin Kombëtaren vetëm kur ajo ka vëmendjen maksimale. “Mjafton që Shqipëria të fitojë, asgjë tjetër nuk ka më rëndësi”! /Sport Ekspres/
