Një ditë pas ngjarjes së rëndë në Shkodër, ku u vetëvra 47-vjeçari Ardian Kallami sapo doli nga komisariati, ku ishte shoqëruar si i dyshuar për vjedhje, kreu i Policisë së Shtetit, Ardi Veliu, ka urdhëruar pezullimin nga detyra të shefit të komisariatit të Vaut të Dejës, Paulin Çupi, dhe të dy policëve të zonës, Petrit Zhejanin dhe Z. D.
Ngjarja ka shqetësuar dhe ministrin e Brendshëm, Fatmir Xhafaj, i cili ka urdhëruar SHÇBA që të nisë menjëherë procesin e verifikimit dhe hetimin së bashku me Prokurorinë. Xhafaj i ka kërkuar kryepolicit Veliu të shqyrtojë çështjen me prioritet dhe të marrë masa, deri në hetimin e plotë të ngjarjes nga prokuroria.
Njoftimi i policisë:
Lidhur me ngjarjen ku u gjet i vetëvarur shtetasi A.K., 47 vjeç, i shoqëruar për disa orë në Polici si i dyshuar për vjedhje, sqarojmë se: Pasi është vënë dijeni mbi ngjarjen Ministri i Brendshëm z.Fatmir Xhafaj ka urdhëruar Shërbimin e Çështjeve të Brendshme dhe Ankesave (SHÇBA) që në bashkëpunim me Prokurorinë të nisi një proces verifikimi dhe hetimi.
Pas verifikimeve paraprake ndaj punonjësve të Policisë të dyshuar si të implikuar me përgjegjësi, Ministri i ka kërkuar Drejtorit të Përgjithshëm shqyrtimin e çështjes me prioritet dhe marrjen e masave përkatëse deri në hetimin e plotë të ngjarjes nga Prokuroria e Rrethit Gjyqësor Shkodër.
Drejtori i Përgjithshëm i Policisë së Shtetit z.Ardi Veliu sot ka urdhëruar masën e pezullimit nga detyra, përkatësisht për P.Ç., Shef i Komisariatit të Vaut të Dejës dhe punonjësit Z.D dhe P. Zh., me detyra SPZ (Specialist policor i zonës). Materialet përkatëse janë referuar pranë Prokurorisë së Rrethit Gjyqësor Shkodër, për ndjekje të mëtejshme penale konform ligjit.
