Vettingu ‘djeg’ dy gjyqtarë të Gjykatës së Lartë, shkarkohen Tom Ndreca dhe Admir Thanza

Ikin dy gjyqtarë nga Gjykata e Lartë. Komisioni i Pavarur i Kualifikimit, ka dhënë sot vendimin për dy gjyqtarët Tom Ndreca dhe Admir Thanza. KPK vendosi shkarkimin e tyre nga detyra, pasi hetoi dhe konstatoi se dy gjyqtarët nuk përmbushnin kriteret për të vijuar punën në sistemin e drejtësisë. Me largimin e tyre nga detyra, Gjykatës së Lartë i mungojnë 3 anëtarë pasi gjyqtarja Mirela Fana ka dhënë dorëheqjen që para nisjes së procesit. Ndërsa Edmond Islamaj, anëtar i kësaj gjykate, kaloi me sukses filtrat e Vettingut dhe u rikonfirmua në detyrë.

Gjyqtari i ’21 janarit’ ngec te pasuria, bleu 4 apartamente në 7 vite
Tom Ndreca nuk ka kaluar kriterin e pasurisë, pasi në 7 vite ka deklaruar blerjen e 4 apartamenteve, për të cilat nuk justifikon burimin e të ardhurave. I njohur si gjyqtari që i dha Lulzim Bashës fitoren në tavolinë për Bashkinë e Tiranës në 2011 dhe për gjykimin e dosjes së “21 Janarit”, deklaroi se ka blerë katër shtëpi me kursimet nga pagat. Banesat i deklaron në harkun kohor nga viti 2003 deri në vitin 2010, por sipas KPK, Ndreca nuk justifikon burimin e pasurisë.

Krahas pasurisë së pajustifikuar, KPK ka zbuluar edhe kontakte të gjyqtarit me një person të arrestuar për kultivim narkotikësh.

Në deklaratën fillestare të vitit 2003, Tom Ndreca deklaron se është pronar me 50% në dy apartamente, secili 2+1. Apartamenti i dytë ka një sipërfaqe prej 120 m2 dhe garazh 18 m2, ndërsa ndodhet në Tiranë. Në vitin 2009, Ndreca deklaron një apartament në Golem, me sipërfaqe 70 m2, me vlerë 31 mijë euro. Si burim, gjyqtari deklaron kursimet nga pagat. Një viti më vonë, në vitin 2010, Ndreca deklaron një apartament me sipërfaqe 100 m2, me vlerë 6 000 000 lekë. Apartamentin e ka shlyer deri në vitin 2015.

Po gjatë këtyre viteve, Ndreca deklaron kursime vjetore nga pagat që variojnë deri në 17 milionë lekë të vjetra. Ndërkaq, të ardhurat e anëtarit të Gjykatës së Lartë përbëhen nga paga e tij, paga e bashkëshortes, e cila ka dalë në pension në vitin 2017 si dhe pagat e dy djemve, të cilët punojnë pranë Ministrisë së Drejtësisë dhe Zyrës së Regjistrimit të Pasurive të Paluajtshme.

Trupa e KPK që shkarkoi gjyqtarin e Gjykatës së Lartë, Tom Ndreca përbëhej nga Brunilda Bekteshi, Roland Ilia dhe Firdes Shuli.

I dënuar në Itali për vjedhje, Vettingu i “pret kokën” edhe Admir Thanzën
Edhe Admir Thanza është shkarkuar nga KPK seancën e ditës së sotme për fshehje dënimi në Itali për vjedhje dhe deklarim të rremë pasurie. Trupa gjykuese që vlerësoi gjyqtarin e Gjykatës së Lartë përbëhej nga Brunilda Bekteshi, Lulzim Hamitaj dhe Olsi Komici. Gjyqtari nuk ishte i pranishëm në seancë, por përfaqësohej nga avokati, Theodhori Sollaku.

Në konkluzionet e ILDKP për gjyqtarin Admir Thanza rezultonte se:

1.     Deklarimi nuk është i saktë në përputhje me ligjin
2.     Nuk ka burime financiare të ligjshme për të justifikuar pasuritë
3.     Ka kryer fshehje të pasurisë
4.     Ka kryer deklarim të rremë
5.     Subjekti nuk gjendet në situatën e konfliktit të interesave

Anëtari i Gjykatës së Lartë doli javën e kaluar para komisionit të Vettingut, ku rezultoi me një mori me probleme. Atij iu zbulua një dënim në Itali për vjedhje në supermarket. Dënimin, Thanza nuk e ka deklaruar në formular, ndërsa përpara KPK-së ka deklaruar se aktin e kishte kryer kunata e tij, por ai e mori përsipër për nipin e sëmurë që po kurohej nga një sëmundje e rëndë në Itali.

Ka qenë asistenca e Operacionit Ndërkombëtar të Monitorimit ajo që ka ndihmuar në zbulimin e këtij dënimi të padeklaruar nga Thanza. Ka qenë DSIK (Drejtoria e Sigurimit të Informacionit të Klasifikuar), që ka konkluduar se Thanza ka fshehur procedimin penal për korrupsion dhe se ka kontakte të papërshtatshme me krimin e organizuar. Gjithashtu, gjyqtari rezultonte edhe pronar i disa apartamenteve, për të cilët nuk justifikon pasurinë.

Megjithëse atij Vettingu i zbuloi një mori me probleme, ato në asnjë rast nuk kanë përbërë problem për Kuvendin e Shqipërisë, i cili e ka votuar dy herë si gjyqtar në Gjykatën Kushtetuese dhe atë të Lartë. Kësisoj, Komisioni i Pavarur i Kualifikimit (KPK) vendosi sot të shkarkojë nga detyra gjyqtarin Admir Thanza, ndaj të cilit ka nisur edhe një hetim nga Prokuroria për fshehje të dënimit në Itali.