Përplasje fizike mes kandidatëve socialistë në qarkun e Durrësit. Ngjarja ka ndodhur ditën e sotme në atë që njihet si shtabi qendror i fushatës së socialistëve në qytetin bregdetar.
Nga raportimet mësohet se në sherr u përfshinë kandidatët për deputet Alban Xhelili dhe Erion Meka. Xhelili mban numrin 2 në listën e PS-së për Durrësin, ndërsa Meka, numrin 15.
Shkak i konfliktit mes tyre ishte përdorimi i mbështetësve të PS-së për fushatë, gjë që ka shkaktuar pakënaqësi brenda kampit socialist, gjë për të cilën nuk janë kursyer grushtet mes kandidatëve.
Nga raportimet mësohet se konflikti ka nisur në brendësi të ambientit që përdoret nga Partia Socialiste në zonën e Plazhit në Durrës për të vijuar edhe jashtë me shkelma dhe grushte.
Në vendin e ngjarjes ka shkuar edhe policia, e cila ka ndërhyrë për të shuar konfliktin. Siç mësohet paraprakisht, pas sherrit u shoqëruan në komisariat gjashtë persona, mes tyre edhe shefi i shtabit të PS për zonën e Plazhit, Eri Kapllani.
