Rizespor-Beshiktash, 1-1. Me këtë rezultat është mbyllur ndeshja e sotme në Turqi, ndërsa Beshiktashi vazhdon me krizën e madhe të rezultatit dhe rënimin total. Ndërkohë ajo që ka interes për shqiptarët është padyshim performanca e Ernest Muçit. Sot ishte një ndeshje shumë e veçantë për Muçin, jo vetëm e para në 2025, por njëkohësisht edhe ndeshja më e vështirë e karrierës.
Në këto kohë të fundit te Beshiktashi ka ndodhur një tërmet i madh, që nga zgjedhjet për ndërrim të presidentit te kritikat e mëdha, gjithçka lidhje me Ernest Muçin. Madje sipas mediave turke, dështimi më i madh i presidentit të Beshiktashit ishte transferimi i Ernest Muçit për shifrën e madhe të parave që u ble nga Legia e Varshavës dhe për këtë arsye duhej të largohej. Një tjetër gazetar në Turqi la një aludim në ajër se për transferimin e Ernest Muçit nga Legia pati një korrupsion, pra shifra u fry pasi në të vërtetë te Legia nuk shkuan aq para sa pretendohet zyrtarisht.
Të gjitha këto akuza kishin një të përbashkët: “Ernest Muçi nuk vlen, të paktën jo në këto shifra që përmendet”. Dhe në mes të gjithë kësaj tymnaje të madhe, sulmuesi shqiptar luajti sot titullar ndaj Rizespor. Me një Beshiktash që e ka humbur busullën dhe në një stadium të flaktë, Muçi i kishte të gjithë kundër, saktësisht është kthyer në “kokë turku” në Turqi.
Në rrjetet sociale qarkullon edhe një ide te tifozët e Beshiktash se Muçi nuk lëviz nga vendi dhe qëndron shumë larg zhvillimit të aksionit. Këtë tezë kaq shumë të përmendur duket se e kanë përthithur edhe shokët e tij të ekipit te Beshiktash. Në shumë raste Muçi është kritikuar rëndë sot edhe nga shokët e ekipit që e kritikonin të shtynte më përpara kur shokët e tij e kishin topin në zotërim.
Në një farë mënyre, të gjithë donin të hiqnin barrën e tyre nga dështimi dhe të fajësonin djaloshin shqiptar. Dhe në gjithë këtë ambient të krijuar kundër tij, Muçi prodhon një magji. E shtrin në tokë kundërshtarin me një super driblim, avancon me topin në zonë dhe pavarësisht se mund të pasonte, bën më të vështirën, me personalitet të madh merr hapësirën dhe dërgon topin në cepin e rrjetës
Ky ishte goli i vetëm i Beshiktash, ndërsa në pjesën e dytë Muçi ka turpëruar edhe kundërshtarin me ruletën e Zidan, duke e lënë pas vetes me driblimin fantastik. E gjitha kjo, në ambientin dhe kohën më armiqësore për të.
Për këtë arsye, ky gol i Ernest Muçit sot ishte si një gol i shënuar kundër Serbisë në mes të Beogradit, ambienti ishte po kaq i nxehtë, por djaloshi shqiptar magjepsi me ftohtësinë që tregoi. Të luash në kushte të tilla është e pamundur, duhet të kesh shumë personalitet dhe karakter për ta bërë, por Muçi jo vetëm që ia doli, por shënoi edhe një super gol. Përpara se Muçi të shënonte, të gjithë tifozët e Beshiktash po e ofendonin dhe kritikonin në Tëitter se duhej të largohej njëherë e mirë nga ky ekip, por pas golit të shënuar, të gjithë heshtën dhe madje kritikuan trajnerin se përse e nxori nga fusha në minutën e 74. /Sport Ekspres/
