Studentët rikthehen për mësim në auditoret e universiteteve dhe largohen nga protesta. Të pyetur nga ATSH ata thanë se protesta nuk është më si në ditët e para, dhe se ata nuk ndjehen më të përfaqësuar.
Një student i Universitetit Bujqësor të Tiranës tha se është rikthyer në mësim që të martën. “Po jemi kthyer në mësim që dje. Ne kemi qenë pjesë e protestës së studentëve por pamë që nuk vazhdohej më, ranë tani studentët, të gjithë e lanë, u pa që nuk kishte më interes, plus që po zgjatet shumë, si pa interes”.
Një tjetër student po nga Universiteti Bujqësor tha se është i interesuar të zhvillojë provimet e sezonit. “Kam ardhur për të zhvilluar provimet e mbartura të viteve të kaluara”.
Edhe një studente tha se mësimi ka filluar, por interesi kryesor janë provimet e mbartura.
“Ajo tha se ka marrë pjesë në protestën e studentëve vetëm tre ditët e para, dhe theksoi se nuk e sheh më të arsyeshme ta vazhdojë. “Nuk më duket e arsyeshme të vazhdohej protesta duke bojkotuar mësimin”.
Një tjetër studente e Universitetit Bujqësor të Tiranës tha se ky është sezon provimesh. “Unë jam në master dhe më intereson që ta mbyll shkollën shpejt”. Ajo foli edhe për protestën e studentëve. “Unë kam qenë në proteste e isha dakord në fillim, por tani nuk me pëlqen si vazhdoi protesta”.
Një vajzë tjetër studente, tha se në këtë paqartësi të madhe është më mirë të ndjekim studimet. “Me që nuk po merret vesh se çfarë po bëhet është më mirë të vijmë të bëjmë mësim”.
Ndërsa një student i Fakultetit të Inxhinierisë së Ndërtimit, tha se tashme studentët e kanë të qartë qëllimin protestës. “Ti e di se përse kemi ikur nga protesta, logjikisht, protesta e ka humbur sensin”.
Ndërsa te Fakulteti i Shkencave Sociale nuk po zhvillohej mësim, por studentët kishin ardhur në masë dhe po zhvillonin aktivitete të ndryshme. Një studente na shpjegoi se ata po lexojnë, të tjerë po mësojnë, një grupim tjetër këndon, diskutohet, ligjërohet e shumë aktivitete të tjera.
