Thellohet lufta në prapaskenë për të mbajtur peng shkarkimin e presidentit nga detyra. Gjykata Kushtetuese është momentalisht me 7 anëtarë dhe marrja e një vendimi për këtë çështje do jetë tepër e vështirës nëse nuk plotësohen 3 vakancat e fundit.
Këshilli i Emërimeve në Drejtësi prej muajit gusht ka nisur punën për të mbyllur verifikimin e kandidatëve të sjellë nga Gjykata e Lartë, por nuk ia ka dalë dot.
Gazeta pak ditë më parë tregoi se si Drejtoria e Informacionit të Klasifikuar ka penguar punën, duke mos pajisur me certifikata sigurie disa prej anëtarëve të KED. Duke mos pasur këtë certifikatë ata nuk kanë akses në të dhënat sekrete, por duket se ky nuk është institucioni i vetëm që po sjell pengesa, pasi mësohet se dhe institucionet e tjera ku janë kërkuar të dhëna për kandidatët nuk kanë sjellë informacione. Pasditen e së mërkurës, KED ka zhvilluar një mbledhje, ku është diskutuar mbi situatën aktuale.
Aty është bërë e ditur se shumë përgjigje nuk kanë ardhur dhe kjo po zvarrit punën. “Këshilli i Emërimeve në Drejtësi, informoi mbi ecurinë e deritanishme të mbledhjes së informacionit nga ana e institucioneve dhe organeve që kanë detyrimin të japin informacion për plotësimin ose mosplotësimin e kushteve nga ana e kandidatëve. Kjo gjë u evidentua edhe nga raportet e paraqitura nga anëtarët relator përsa u përket vështirësive dhe pengesave që ata kanë hasur gjatë veprimtarisë së tyre”, thuhet në një njoftim për mediat të KED.
Anëtarët e cilësuan situatën si të jashtëzakonshme, prandaj kërkuan të merren masa dhe të kërkohet nga institucionet që të kthejnë përgjigjet e kërkuara. “Në këto kushte K.E.D. vlerësoi që është e nevojshme të caktohen detyra dhe të merren masa të menjëhershme, duke kërkuar angazhimin maksimal të institucioneve dhe organeve që kanë vonuar apo mospërmbushur ende detyrimet ligjore për të bashkëpunuar me KED, në paraqitjen e informacioneve të kërkuara, në mënyrë që Këshilli të vijojë më përmbushjen e detyrimit ligjor të vlerësimit, pikëzimit, renditjes së kandidatëve. Po kështu K.E.D. diskutoi edhe për mundësinë e marrjes së disa masave shtesë me qëllim realizimin e këtij detyrimi”, thuhet në njoftim.
Kërkesat e KED
Sipas të dhënave të siguruara nga gazeta, KED ka dërguar shkresa në rreth 50 institucione private e shtetërore duke kërkuar të dhëna për secilin emër. Sa u takon institucioneve shtetërore, KED ka kërkuar të dhëna nga: Agjencia Shtetërore e Kadastrës; DPSHTRR, D.P.Tatimeve; Ministria e Drejtësisë; OSHEE; QKB; UKT; Prokuroria e Përgjithshme; SHISH; DSIK; ILDKP; Autoriteti i Dosjeve; Dhoma e Noterëve; Dhoma e avokatisë. Në këto institucione janë kërkuar të dhëna sa i takon pasurisë, nëse personat në fjalë janë të dënuar apo jo si dhe nëse janë të dyshuar për aktivitete kriminale apo korrupsion. Si dhe po verifikohet nëse kanë qenë bashkëpunëtorë të Sigurimit të Shtetit. Ndërkohë një tjetër verifikim po bëhet në të gjitha bankat e vendit sa u takon llogarive bankare apo kredive të mundshme që mund të kenë 9 kandidatët.
Bankat ku po kryhen verifikime janë: Banka Alpha Albania; Banka Amerikane e Investimeve; Banka Credins; Banka e Bashkuar e Shqipërisë; Banka e Kreditit e Shqipërisë; Banka e Parë e Investimeve; Banka Intesa Sanpaolo; Banka Kombëtare Tregtare; Banka Ndërkombëtare Tregtare; Banka Procredit; Banka Raiffeisen; Banka Societe Generale; Banka Tirana dhe Banka Union. Po ashtu një verifikim i ngjashëm po bëhet te institucionet mikrofinacire, të cilat japin kredi në shuma të ulëta. Gjithashtu verifikime po bëhen dhe në fondet e pensioneve private. Sipas burimeve, pritet që KED në shtator të ketë gati informacionet dhe më pas të bëjë vetëm verifikimin dhe në fund renditjen e kandidatëve.
9 kandidatët për në Kushtetuese
1. Albert Demirneli
2. Alket Jaupi
3. Dhimitrula Spiro
4. Ervin Karamuço
5. Helena Papa
6. Saimir Visha
7. Sandër Beci
8. Vatë Staka
9. Zhaklina Peto
9 anëtarët e KED
1. Ervin Pupe (nga Gjykata e Lartë) – Kryetar
2. Marsida Xhaferllari (nga Gjykata Kushtetuese) – Zëvendëskryetare
3. Elsa Toska (nga Gjykata Kushtetuese) – Anëtare
4. Adnan Xholi (nga Prokuroria e Përgjithshme) – Anëtar
5. Astrit Kalaja (nga Gjykatat e Apeleve) – Anëtar
6. Elona Toro (nga Gjykatat e Apeleve) – Anëtare
7. Gjon Fusha (nga Zyrat e Prokurorive pranë Gjykatave të Apelit)…Anëtar
8. Genti Xholi (nga Zyrat e Prokurorive pranë Gjykatave të Apelit) – Anëtar
9. Rilinda Selimi (nga Gjykatat Administrative) – Anëtare
