Edhe pse zyrtarisht ka vetëm 3 anëtarë, Vitore Tusha duket se po bën ligjin në Gjykatën Kushtetuese. Ndonëse i ka mbaruar mandati dhe nuk është emëruar zyrtarisht kryetare, çdo vendim në Kushtetuese duket se është në dorë të saj. Edhe pse për Marsida Xhaferllarin nuk pati asnjë vendim nga anëtarët e ligjshëm, emri i saj u publikua në faqen zyrtare të Kushtetueses.
Ndërkohë e njëjta gjë ka ndodhur edhe ditën e djeshme me rastin e Besnik Muçit. Gjykata Kushtetuese ka hequr dje nga faqja zyrtare emrin e Besnik Muçit, pa bërë asnjë procedurë ligjore. Edhe pse për çdo akt duhet një vendimmarrje, Tusha duket se po e përdor Kushtetuesen sipas dëshirave të saj dhe jo sipas ligjit.
Lëvizjet e Besnik Muçit
Edhe pse u shkarkua nga vetingu, Besnik Muçi dje herët në mëngjes u pa në ambientet e Gjykatës Kushtetuese, ndërsa më pas publikoi një letër, ku sërish nuk njihte vendimin e shkarkimit. Në letrën e tij Muçi akuzon Kolegjin e Apelimit se e votoi në kundërshtim me ligjin, përderisa ai e ka humbur statusin e magjistratit, në momentin kur u betua para presidentit si anëtar i Kushtetueses. “Statusi im i Prokurorit rezulton se ka përfunduar që prej datës 18 tetor 2019, moment ky kur unë kam filluar të ushtroj detyrën e gjyqtarit të Gjykatës Kushtetuese. Me përfundimin e këtij statusi, procesi i rivlerësimit nuk mund të vazhdonte dhe vendimi i Kolegjit të Apelimit nuk mund të ketë efekt ndaj funksionit dhe mandatit aktual të Gjyqtarit të Gjykatës Kushtetuese”, thuhet në letrën e Muçit drejtuar Kushtetueses.
Sipas tij vendimi i Kolegjit nuk mund të ketë efekt mbi funksionin e tij të ri, përderisa është emëruar tri vite pas hyrjes në fuqi të ligjit për funksionimin e Gjykatës Kushtetuese. “Shtrirja e efekteve të vendimit të Kolegjit automatikisht mbi funksionin e anëtarit të Gjykatës Kushtetuese, duke vendosur shkarkimin, është jo vetëm i paargumentuar dhe pa referencë ligjore, por është në kundërshtim me nenin 127/2 të Kushtetutës. Po ashtu nuk rezulton që në ngarkimin tim të ketë ndonjë proces disiplinor për të cilin Kolegji i Posaçëm i Apelimit ka juridiksion”, shprehet ai në letër.
Meta shpall vakancën
Por pavarësisht qëndrimeve të Muçit, Presidenti i Republikës Ilir Meta ka njohur vendimin e KPA, që shkarkoi nga detyra Besnik Muçin. Ditën e djeshme presidenti është takuar me Besnik Muçin, por ky i fundit nuk ka marrë atë çfarë priste nga presidenti. Sipas njoftimit të Presidencës, kreu i shtetit i ka kërkuar të vlerësojë mundësinë për të riparë qëndrimin e tij më të fundit. “Presidenti Meta i kërkoi zotit Muçi që të vlerësonte mundësinë që të rishikonte qëndrimin e tij më të fundit për të kërkuar nga Gjykata Kushtetuese që të shprehej me vendim për të deklaruar përfundimin e mandatit të tij si gjyqtar kushtetues. Z. Muçi i deklaroi Presidentit Meta se procesi i rivlerësimit kalimtar i kryer në Kolegjin e Posaçëm të Apelimit ka qenë tepër diskriminues edhe për faktin e qëndrimeve të tij si gjyqtar kushtetues.
Z. Muçi i shprehu Presidentit Meta se nuk është politikan, por një jurist dhe duhet të veprojë si i tillë deri në fund për të kërkuar të drejtat e tij pranë çdo gjykate ndërkombëtare, vendimi i së cilës ka juridiksion ndaj Republikës së Shqipërisë”, thuhet në njoftimin e Presidencës. Menjëherë pas takimit me gjyqtarin e shkarkuar nga vetingu, presidenti Meta ka dekretuar shpalljen e vakancës për këtë vend. Meta ka pranuar shkarkimin e Muçit nga Komisioni i Pavarur i Apelimit dhe i ka hapur rrugë zgjedhjes së një tjetër gjyqtari për në Gjykatën Kushtetuese. /Arbjona ÇIBUKU
