Ministri i Brendshëm Aleksandër Vulin u shpreh se pasi Serbia të pranojë se “nuk dëshiron” të jetë nga Bashkimi Evropian (BE) dhe se “nuk ka vend atje, do të jetë më mirë për ne”.
“Nuk është çështja nëse ne duam të anëtarësohemi në BE, është çështja nëse BE-ja do Serbinë. Duke gjykuar nga shantazhi i çmendur që po na ekspozojnë për të njohur Kosovën, për të shfuqizuar Republikën Srpska dhe për të vendosur sanksione ndaj Rusisë, ata nuk na duan”, tha Vulin për Veçernje Novosti.
Ai tha se BE-ja si aleancë është “një gjë e së kaluarës”, sepse me humbjen e pavarësisë politike, vendet e BE-së “u bënë territore, jo shtete”. “Sa më shpejt të pranojmë se ata nuk na duan dhe se ne nuk i përkasim atje, aq më mirë do të jemi”. Qëndrimi ndaj BE-së nuk është çështje emocionesh, por vendimesh racionale”, theksoi ministri në Qeverinë e Serbisë.
Për shtatë muaj e gjysmë Perëndimi dhe Bashkimi Evropian kanë kërkuar që Serbia të vendosë sanksione ndaj Rusisë dhe Beogradi po peshon, duke marrë parasysh se çfarë do të fitonte dhe çfarë do të humbiste. Në listën e “fitimeve” janë relaksimi i marrëdhënieve me SHBA-në dhe BE-në, fondet e BEsë, të cilave deri në vitin 2027 u janë ndarë 1.5 miliardë euro dhe përmirësimi i marrëdhënieve me fqinjësinë.
Në anën tjetër, jostabiliteti energjetik, humbja e mundshme e mbështetjes politike, para së gjithash rreth Kosovës, si dhe trazirat e brendshme, sepse një numër i madh i qytetarëve serbë janë kundër një vendimi të tillë. Si një nga argumentet pse Serbia nuk vendos sanksione, përmendet mbështetja e Moskës në Kombet e Bashkuara dhe “jo” e saj për hyrjen e Kosovës në atë organizatë. Si anëtare e përhershme e Këshillit të Sigurimit për 23 vjet, ajo avokon për respektimin e Rezolutës 1244.
