Policia dhe prokuroria shumë shpejt pritet që të godasin nivelin më të lartë të politikës dhe botës së krimit. Kryeprokurorja Arta Marku ditën e djeshme u ndal në qytetin e Durrësit, nga ku ka dhënë porosi për gjithë vartësit e saj, ndërsa ka bërë të ditur se pas arrestimeve duhet të sekuestrohen pasuritë e të korruptuarve. Madje, Marku ka qenë e prerë me vartësit e saj, teksa u ka kërkuar që jo vetëm të çojnë para drejtësisë politikanët e korruptuar, por të zbulojnë edhe implikimin e tyre në afera dhe botën e krimit. “Prokurorët nuk duhet të ndalen vetëm me hetimin e veprës penale korruptive por duhet të thellojnë hetimin pasuror të subjektit të veprës penale në lidhje me asetet që kanë në burim të ardhura kriminale nga veprime korruptive. Kjo me qëllim jo vetëm ndëshkimin e autorit për krimin e kryer por dhe sekuestrimin dhe konfiskimin e asteve të krijuar prej tyre”, deklaroi Marku. Në të njëjtën kohë, kryeprokurorja Marku dha edhe një tjetër porosi për vartësit e saj në qytetin e Durrësit, duke kërkuar që të rritet lufta ndaj kontrabandës.Sipas zonjës Marku, prokurorët duhet të angazhohen për të evidentuar krimet në këtë fushë dhe të mos presin referimit që mund të vijnë nga policia e shtetit apo vetë doganat. “Qyteti i Durrësit si një nga qytetet porte te vendit tonë rezulton me shumë pak vepra penale në fushën e kontrabandës, ndërkohë që jemi të vetëdijshëm se sjelljet që cenojnë legjislacionin doganor janë të shumta dhe të ndëshkueshme penalisht. Duhet që edhe kryesisht prokurorët të angazhohen për të evidentuar këto vepra penale në çështjet që hetojnë, duke mos u mbetur të kufizuar vetëm në referimit qe mund të vijnë nga Policia e Shtetit apo vetë doganat”, u shpreh ajo. Ndërkohë, kryeprokurorja u shpreh gjithashtu se konstatohet se ka një ulje të veprave penale kundër jetës, por ka një rritje të agresivitetit nga grupet kriminale në kryerjen e këtyre veprave penale. “Konstatohet se ka një ulje të veprave penale kundër jetës, por ka një rritje të agresivitetit nga grupet kriminale në kryerjen e këtyre veprave penale. Kjo vjen nga mosndëshkimi, apo ndëshkimi i lehte dhe jo proporcional me krimin e kryer dhe rrezikshmërinë e autorit”, nënvizoi kryeprokurorja Marku.
Vjen DEA në Tiranë
Por lufta e nisur nga qeveria dhe prokuroria kundër krimit të organizuar dhe korrupsionit në vend, sidomos ai i ditëve të fundit në kuadër të operacionit “Forca e Ligjit”, ka marrë edhe vëmendjen e ndërkombëtarëve. Ka qenë ministri i Brendshëm, Fatmir Xhafaj, ai i cili dje nga foltorja e Kuvendit, zbuloi se ka zhvilluar takime intensive në Tiranë me ekspertë të FBI dhe DEA-s amerikane në kuadër të operacionit “Forca e Ligjit”. Sipas tij, mbërritja e DEA-s në Tiranë është një dëshmi e qartë se SHBA është krah Shqipërisë në luftën kundër krimit dhe korrupsionit. “Takimet e shumta që kemi patur, edhe këto dy ditë në Tiranë, me ekspertë të FBI dhe DEA, për çështje konkrete dhe shumë të rëndësishme, janë shenjë e dukshme e besimit reciprok të konsoliduar mes nesh me këto dy agjenci ligjzbatuese me reputacion të padiskutueshëm ndërkombëtar”, deklaroi ai. Duke u ndalur tek marrëveshja e nënshkruar mes Prokurorisë dhe Ministrisë së Brendshme, e cila është sulmuar fortë nga opozita, Xhafaj theksoi se nuk ka mbivendosje apo shpërndarje përgjegjësish. Sipas tij, secili nga institucionet kryen punën në mënyrë të pavarur. “Nuk ka deliruar akoma askush nga Policia, Prokuroria, apo edhe Ministria e Brendshme për të bërë atë çfarë ata që janë kundër kësaj marrëveshje po e thonë këto ditë. Ajo marrëveshje nuk krijon norma të reja juridike për veprimtarinë e Prokurorisë dhe Policisë”, nënvizoi Xhafaj.
