Marrëveshja me Greqinë nuk u finalizua as në fund të muajit korrik, ashtu siç ishte paralajmëruar, por kjo nuk do të thotë se puna nuk vazhdon. Shumë pika dhe çështje janë vendosur në tavolinën e diskutimit mes palës shqiptare dhe asaj greke, por duket se vetëm disa prej tyre kanë ngelur pa marrë zgjidhje përfundimtare.
Shumica e problematikave të mbartura ndër vite janë zgjidhur gjatë negociatave, mes të cilave është edhe ajo për heqjen e ligjit të luftës. Një gjë të tillë e bëri të ditur këshilltari për rajonin në Ministrinë për Evropën dhe Punët e Jashtme, Glevin Dervishi gjatë një interviste të dhënë dje për Deutsche Welle. Sipas tij, grekët kanë përgatitur një draft ku deklarojnë se ky ligj do të hiqet, ndërsa pritet vetëm dekreti i Presidentit të Greqisë.
“Pala greke ka arritur që në negociatat e tanishme me palën shqiptare të kuptojë që Ligji i Luftës me Shqipërinë është një relike e historisë. Ajo është zotuar që abrogimi i tij të jetë pjesë e paketës së marrëveshjeve me Shqipërinë. Greqia na ka vënë tanimë në dispozicion një draft të abrogimit të ligjit, që duhet të bëhet me dekret nga Presidenti i Greqisë”, tha Glevin Dervishi. Gjatë kohës që ky ligj ishte në fuqi, Greqia e konsideronte vendin tonë si armik, ndërsa tani duket se gjërat kanë ndryshuar.
Zyrtari i Ministrisë së Jashtme sqaroi më tej gjatë intervistës së tij se çfarë pritet të ndodhë tashmë me heqjen e ligjit të luftës. “Abrogimi i Ligjit të Luftës me Shqipërinë do të shoqërohet edhe me akte të tjera juridike, ku do të përcaktohen mënyrat dhe mekanizmat sesi shteti dhe qytetarët e Shqipërtisë do t’u drejtohen institucioneve e organeve, të përcaktuara nga autoritetet greke për të provuar pronësinë e tyre dhe fituar të drejtën e marrjes së saj, në bazë të dokumenteve zyrtare që disponojnë”, sqaroi ai.
Pakti detar
Ajo që ka shkaktuar shumë debat në politikën shqiptare ka qenë marrëveshja detare mes dy vendeve. Për opozitën tonë, qeveria po i shet det grekëve, mirëpo mazhoranca e ka hedhur poshtë një pretendim të tillë. Situatën e kanë nxehur edhe më shumë deklaratat e kryeministrit grek Aleksis Tsipras dhe ministrit të Jashtëm, Nikos Kotzias, të cilët kanë deklaruar se nga pakti Greqia do të ketë benefite dhe avantazhe të shumta. Mirëpo Ministria e Jashtme nënvizoi edhe një herë dje se negociatat për delimitimin e vijës detare janë bërë dhe do të vijojnë duke u mbështetur tek Kushtetuta.
“Procesi i negociatave për ndarjen e zonave detare mes dy vendeve udhëhiqet nga parimet e të drejtës ndërkombëtare, nga Konventa mbi të Drejtën e Detit, nga parimet e të Drejtës Kushtetuese dhe legjislacionet respektive. Të njëjtin proces Shqipëria ka bërë dhe me Italinë në vitet 1980-1990, sipas kritereve që përcakton Konventa për sovranitetin dhe të drejtat sovrane”, tha Glevin Dervishi.
Teksa bisedimet vijojnë, vazhdon edhe përplasja mes ministrit të Jashtëm, Ditmir Bushati dhe Presidentit të Republikës, Ilir Meta. Ky i fundit deklaroi pak kohë më parë se kërkonte një informacion më të plotë për negociatat me palën greke, duke u shndërruar kështu në një lloj pengese. Por në një intervistë për “DW”, Bushati sqaroi se bisedimet janë në rrugë të mbarë. “Jemi në rrugë të mbarë për të arritur një marrëveshje që do të jetë e zbatueshme, e drejtë dhe shumë më e mirë se ato që kemi parë në të shkuarën”, tha Ditmir Bushati. Më herët ai pati deklaruar se Meta është informuar për çdo hap që është hedhur gjatë negociatave.
Mimoza Ibra
