Vendet vakante të lëna nga përfaqësuesit e PD dhe LSI në Parlament pritet që të plotësohen shumë shpejt. Edhe pse Basha e Kryemadhi kanë lobuar fort për të bindur emrat pasardhës në listë të refuzojnë mandatet, nuk ka ndodhur aspak kështu. Deri më tani 4 anëtarë të LSI kanë marrë mandatet. Ndërsa 3 të tjerë po nga LSI dhe 3 nga PD kanë dorëzuar formularët e dekriminalizimit. Por ky numër do të rritet në ditët në vijim. Të martën PD dhe LSI dorëzuan në KQZ dosjet e kandidatëve pasues në lista. Demokratët dorëzuan 103 dorëheqje, ndërsa LSI 75.
Por nëse bëhet një llogaritje e thjeshtë, rezulton se një pjesë e madhe e kandidatëve pasues në lista kanë refuzuar Bashën e Kryemadhin. Në zgjedhjet e 2017, Basha dorëzoi në KQZ një listë me 194 kandidatë. Nga këta vetëm 43 fituan mandatin e deputetit. Por pasi u dogjën mandatet, sipas ligjit ato duhet t’u kalojnë emrave pasues, të cilët janë 151. Por PD të martën dorëzoi në KQZ 103 dorëheqje, çka do të thotë se 48 nuk kanë pranuar të dorëhiqen. Kjo do të thotë se të parët mund të marrin mandatin, derisa të plotësohen vendet vakante.
E njëjta gjë ka ndodhur dhe me LSI. Kjo pari në 2017 ka dorëzuar në KQZ një listë me 146 kandidatë, ndërsa fitoi 19 mandate. Pra mbetën 127 emra pasues dhe atyre tani u kalon e drejta të marrin mandate e lëna bosh. Duke qenë se LSI ka dorëzuar në KQZ vetëm 75 dorëheqje, 52 emra kanë refuzuar të dorëhiqen. Kjo shifër përfshin dhe 4 emrat që kanë pranuar tashmë mandatin, ndërsa 48 të tjerë pritet të njoftohen në ditë në vijim nga KQZ. Pra shanset që në Parlament të futen emra të rinj janë shumë të mëdha. Kur Basha vendosi të digjte mandate nuk mendoi se emrat pasardhës do e refuzonin. Por ka shumë nga ata që kanë kundërshtuar çdo thirrje për të djegur mandatet.
Reagon Maliqi
Një ndër emrat që ka hapur shumë debat ditët e fundit është Lefter Maliqi, kandidati i PD në Berat. Ai ka folur dje për mediat, duke kritikuar ashpër Lulzim Bashën. “Unë tani përfaqësoj PD. Unë jam me të gjithë demokratët që rrinë protestojnë dhe gënjehen nga Luli, me tik taket e Lulit, me shumëzimet e Lulit.
Pse them unë jam mirënjohës me Sali Berishën ose për Ilir Metën. Këta thonë po ose jo. Ky nuk mban fjalë. Ky na mbajti 3 muaj në çadër dhe na tregonte parime demokratike. Vuri në listë kandidatët që ishte turpi i PD. Unë kam dalë kundër Lulit. Ku ka lidhje Luli, nga kamarier u bë miliarder nga Sali Berisha. Del ky kundër Jozefina Topallit, ku di ky çfarë është PD. Del kundër Ridvan Bodes, Bregut, Patozit etj.
Kush është ky?! Fryma e përjashtimit nuk të sjell fitore”, tha Maliqi. Në një studio televizive ai tregoi mesazhet që demokratët i dërgonin Sali Berishës pasi Basha mori drejtimin e PD. Ai pranoi se kauza e opozitës për blerje votash qëndron, pasi vota ka vjedhur edhe PD me LSI. Sipas tij PD do të fitojë vetëm kur Basha të ikë nga drejtimi i partisë. “Për vjedhje votash, qëndron si nuk qëndron. Ka vjedhur edhe PD edhe LSI, kush më shumë e kush më pak. E di pse kërkojnë largimin e kryeministrit këta? Këta kërkojnë largimin e kryeministrit sepse e shikon Luli që nuk fiton dot. PD fiton po të ndryshojë lidershipin.
Nuk ngjall shpresë, nuk frymëzon, nuk mban fjalë, nuk sjell optimizëm. Flet fjalë të bukura 7 x 6, 49 , këndon tik-take, po nuk është kjo. Nuk është lider, madje i çonin mesazhe Berishës “çfarë në bëre”, demokratë që ishin aty, i çonin mesazh “kthehu ose të gjendet një tjetër”, d.m.th nuk ngjit. Unë them e mori doktori për dore e bëri miliarder. Gjynah për demokratët, i la në atë rrugë dhe po i përdor. PD do të fitojë pasi të ikë Luli. Nuk është i aftë Luli”, tha ai. /Kliti Topalli
