Vetingu në sistemin e drejtësisë duket se po ecën me ritme të shpejta, pavarësisht përplasjeve politike. Teksa vëmendja është përqendruar te Gjykata Kushtetuese, Komisioni i Pavarur i Kualifikimit ka përcaktuar dje listën e radhës të gjyqtarëve dhe të prokurorëve që do të futen në procesin e vetingut. Gazeta ka siguruar listën me 48 emra, për të cilët nga sot nis skanimi i pasurisë, i pastërtisë së figurës dhe karrierës.
Por për kë bëhet fjalë? Në listë janë kryesisht drejtues prokurorish, nënkryetarë si dhe disa gjyqtarë të gjykatave në rrethe. Por në listë ka dhe emra shumë të njohur. Në krye të saj qëndron Dritan Gina. Bëhet fjalë për prokurorin e Elbasanit, i cili u shkarkua nga Arta Marku bashkë me bashkëshorten e tij Rovena Gashin, e cila ngeli në veting. Një tjetër emër i njohur është Agron Gjana, prokuror i Durrësit. Ai është përfolur në media se është pjesë e listës së zezë të SHBA, pasi i është refuzuar një herë viza.
Tjetër emër është Drini Pali, prokuror po në Durrës, ai ka pasur një përplasje me ish-Kryeprokuroren Ina Rama, e cila e shkarkoi nga detyra, por u rikthye më pas. Mes emrave është dhe prokurori i Gjirokastrës Spartak Çoçoli, i cili pak kohë më parë u shoqërua në polici pas akuzës së një gruaje për korrupsion. Bujar Memia është tjetër emër që do hyjë në veting. Ai është prokuror në Krujë dhe pak kohë më parë nisën hetimet pasi ndaj tij ka pasur një kërcënim me jetë. Tjetër emër i shortuar nga KPK është Enkeleda Doda, gjyqtare e Gjykatës së Sarandës. Ndaj saj ka pasur një kallëzim disa vite më parë nga ILDKP për fshehje pasurie.
Në listë është dhe Matilda Llangozi, Gjykata e Rrethit Gjyqësor Berat. Kohë më parë Ministria e Drejtësisë ka kërkuar shkarkimin e saj, por është refuzuar nga KLD. Tjetër emër është Ali Koleci, Gjykata e Rrethit Gjyqësor Mat. Ai është hetuar nga Ministria e Drejtësisë, pasi dyshohej se transferoi një të burgosur në shkelje të ligjit. Mes emrave është dhe gjyqtari, Ken Dhima, pjesë e Gjykatës Administrative e Shkallës së Parë Vlorë. Për të është kërkuar shkarkim nga Ministria e Drejtësisë, por është refuzuar nga KLD. Në listë ka dhe disa emra të tjerë që kanë pasur probleme me të shkuarën e tyre.
Procedura e vlerësimit të pasurisë
Sipas ligjit, të gjithë emrat në fjalë fillimisht do futen në skanerin e ILDKP. Ky institucion, bazuar në deklarimet e pasurive, zhvillon një procedurë të plotë kontrolli. Nga ana tjetër, Inspektori i Përgjithshëm i ILDKP, për qëllimet e rivlerësimit, mund të kërkojënëpërmjet Drejtorisë së Përgjithshme të Parandalimit të Pastrimit të Parave ose Ministrisë së Drejtësisë dokumentet për pasuritë në pronësi të subjekteve të rivlerësimit dhe personave të lidhur me ta, dokumentet që përdoren jashtë shtetit nga subjektet e rivlerësimit dhe personat e lidhur me ta, ose të dhënat financiare mbi çdo transaksion financiar brenda ose jashtë vendit në përputhje me ligjin “Për parandalimin e pastrimit të parave dhe financimit të terrorizmit” të subjekteve të rivlerësimit dhe personave të lidhur me ta. Këto dokumente ose informacione mund të përdoren në cilësinë e provave përpara Komisionit ose Kolegjit të Apelimit.
Standardet e kontrollit e figurës
Sa i takon figurës, në ligj thuhet se kontrolli i saj zhvillohet bazuar në prova të sakta, në informacione konfidenciale, si dhe informacione të tjera të disponueshme. Kontrolli i figurës zhvillohet në mënyrë objektive dhe pa ndikime të karakterit personal, armiqësor dhe miqësor, të cilat mund të favorizojnë ose disfavorizojnë subjektin e rivlerësimit. /Kliti Topalli
