Thellohet konflikti mes kreut të Partisë Demokratike, Lulzim Basha dhe presidentit Ilir Meta. Ky i fundit prej një jave ka nisur një fushatë sulmesh dhe akuzash kundër kryedemokratit Basha, ndërkohë që sikur të mos mjaftonte kjo, ai është rreshtuar hapur krah ish-kryeministrit Sali Berisha, në betejën e nisur prej tij kundër liderit legjitim të PD.
Por i ndodhur përpara kësaj situate, kreu i Partisë Demokratike Basha ka shpërthyer në sulme dhe akuza të forta në adresë të presidentit Ilir Meta dhe ish-kryeministrit Sali Berisha.
Gazeta ka mësuar se dy ditët e fundit, PD me porosi të kryetarit Basha, iu ka dërguar një udhëzim degëve të Partisë Demokrtike në të gjithë vendin, ku njeh bazën demokrate me puçin Meta-Berisha kundër PD-së dhe liderit të saj, Lulzim Basha.
Meta pritet të shpallet “non grata”
Kështu më konkretisht, në udhëzim listohen të gjitha arsyet se përse Meta dhe Berisha janë hedhur në sulm kundër Bashës, ndërsa gjithashtu zbulohet edhe arsyeja se përse shefi i selisë blu është distancuar nga presidenti. Në këtë kontekst, mësohet se distancimi i Bashës nga kreu i shtetit erdhi sepse ka të dhëna se shumë shpejt edhe ai do shpallet “non grata” nga amerikanët.
“Sot, njeriu hallexhi po përpiqet të tërheqë karrocën e Dylit të Foltores duke ulëritur edhe një herë se fajtori për gjithçka është Basha. Duke harruar që zgjedhjet e 13 tetorit ishin një farsë por edhe duke mos njohur që mos të ishte për hatër të opozitës dhe PD, ndërkombëtarët do ta kishin injoruar njeriun që është i radhës në listën SHBA.
Për demokratët, ai përfundoi pikërisht atë ditë kur në stilin qesharak të premtimeve i premtoi revolucion dhe shkrirje parlamenti për të përfunduar në një miting qesharak me gjunjëzime dhe dërdëllitje.
Hallexhiu i radhës në politikë nxitoi dje të deklaronte fajtorët e humbjes së opozitës kur ishte zotuar që nuk do të dekoronte qeverinë e dalë nga zgjedhjet e vjedhura. Ai e di! Doktori e di! Demokratët e dinë! Radha pas liderit historik të PD është liderit historik të LSI. Numërimi ka nisur, tjetër gjë nuk e shpjegon sjelljen e tij të kësaj të hëne”, thuhet në udhëzim.
Aleanca e Bashës me SHBA tmerron Metën
Më tej në udhëzimin e Partisë Demokratike drejtuar degëve demokrate bëhet e ditur se presidenti Ilir Meta është tërbuar, për shkak se ai është kundër aleancës së kreut të PD, Lulzim Basha me Shtetet e Bashkuara të Amerikës. Sipas asaj që thuhet në udhëzim, Metës nuk i intereson një aleancë e fortë mes SHBA dhe kryedemokratit Basha, por Lëvizja Socialiste për Integrim. “Ilir Metën nuk e merr më askush seriozisht.
Herën e fundit që demokratët e morën seriozisht ishte 2 marsi 2020 kur ai premtoi një hata të madhe dhe përfundoi duke u gjunjëzuar në tokë e duke bërë simbolin e shqiponjës. Meta u shndërrua në atë që e njohin të gjithë tanimë. Hallexhiun e burgosur në Presidencë dhe që sot ka një tjetër hall se do ta transferojnë kund tjetër.
Duke e ditur shumë mirë se është partner në procesin “non grata” ai ka nisur të lëvizë gurët e tij mediatik. Aksionet e tij në mediet e foltores janë angazhuar publikisht të sulmojnë Lulzim Bashën për arsyen e vetme përse Basha është me SHBA dhe jo me LSI”, thuhet në udhëzimin e PD për degët demokrate.
