Presidenti ukrainas Volodymyr Zelensky po ushtron presion mbi Joe Biden, teksa i kërkon Shteteve të Bashkuara që t’i ofrojnë Kievit armë të reja dhe më të fuqishme, përkatësisht një sistem raketash me rreze veprimi prej 305.7 kilometrash, të afta për të arritur Rusinë, raporton New York Times, duke theksuar se lideri ukrainas i ka siguruar amerikanët se nuk ka ndërmend të godasë qytetet ruse apo objektivat civile.
Presidenti Biden nga ana tjetër nuk i është përgjigjur deri më tani kërkesës duke thënë se : “Po përpiqemi të shmangim luftën e tretë botërore”.
Ndërkohë, është qëlluar me armë në drejtim të një kolone që mbante të dërguarin e Papës në Ukrainë, kardinalin Konrad Krajewski, së bashku me dy peshkopë, të cilët shoqëroheshin nga një ushtar, por ata nuk morën lëndime si pasojë e të shtënave.
NATO është gati të mbështesë Ukrainën kundër pushtimit rus për aq kohë sa të jetë e nevojshme.
“Dimri po vjen, por mbështetja jonë do të mbetet e fortë”. Kështu deklaroi admirali Rob Bauer, president i komitetit ushtarak të NATO-s.
“Municionet, pajisjet dhe trajnimet e ofruara nga aleatët dhe kombet e tjera po bëjnë një ndryshim në fushën e betejës”, tha Bauer. Admirali gjithashtu donte të nënvizonte se si ukrainasit, “me sukseset e tyre në terren dhe në internet, kanë ndryshuar rrënjësisht luftën moderne. Ukrainasit ishin shumë kreativë në përdorimin e armëve që u ishin dhënë, ata i përdorën ato në mënyra që ne normalisht nuk i përdorim,” tha ai.
