Emërimi i një lobisti amerikan në KE është në rastin më të mirë i çuditshëm dhe në rastin më të keq i rrezikshëm, pohoi deputeti francez i euros, Geoffroy Didier.
Komisioni Evropian nuk sheh asgjë të kundërshtueshme në emërimin e Fiona Scott Morton, një ish-zyrtare amerikane në administratën e Barack Obamës, si kryeekonomiste, tha një zëdhënëse e KE të premten, një ditë pasi Franca reagoi ashpër ndaj emërimit.
“Ne nuk shohim asnjë arsye për ta rishqyrtuar këtë emërim,” tha të premten zëdhënësja Dana Spinant.
Vendimi i nënpresidentes ekzekutive të KE-së, Margrethe Vestager, për të emëruar si kryeekonomiste një profesoreshë të ekonomisë në Universitetin Yale dhe një ish-zyrtare të Departamentit të Shtetit, shkaktoi reagime të furishme në Francë.
Morton, 56 vjeçe, do të marrë detyrën më 1 shtator kur kryeekonomisti aktual Pierre Regibeau të dalë në pension.
Ajo do të jetë gjithashtu gruaja e parë dhe shtetasja e parë amerikane që do të mbajë detyrë në një institucion evropian.
“Emërimi i çuditshëm dhe i rrezikshëm”
Scott Morton do të luajë një rol kyç në krye të administratës në hetimet e shkeljeve të mundshme të rregulloreve për konkurrencë të barabartë në treg në segmentin e gjigantëve të teknologjisë, si Google, Apple, Meta Platforms dhe Microsoft.
Asaj iu besua gjithashtu një rol kyç në rishikimin e blerjeve të mëdha, si blerja e iRobot nga Amazon dhe blerja e startup-it Figma nga Adobe.
Sipas AFP, Komisioni nuk ka nënshkruar ende një kontratë me të.
Emërimi i Scott Morton vjen në një kohë kur BE-ja duhet të zbatojë ligje të reja, ambicioze për rregullimin e sektorit të përmendur, dhe shefja e KE-së Ursula von der Leyen është vënë nën kritika dhe akuza se ajo është shumë “atlantike”.
Ministri francez për Dixhitalizimin dhe Telekomunikacionin, Jean-Noel Barrot i bëri thirrje Komisionit të “rishqyrtojë zgjedhjen e tij” sepse “emërimi do të ngrejë pyetje legjitime”.
“Punësimi i lobit amerikan të GAFAM (Google (Alphabet), Apple, Facebook (Meta), Amazon dhe Microsoft) në një kohë kur Evropa po përpiqet të kufizojë ndikimin e tyre…Ky emërim në rastin më të mirë është i çuditshëm dhe në rastin më të keq i rrezikshëm (…) Komisioni duhet ta refuzojë atë”, tha eurodeputeti francez Geoffroy Didier.
Eurodeputeti i Gjelbër, Yannick Jadot e quajti emërimin e Scott Morton një “skandal” dhe i bëri thirrje Von der Leyen që “ta kthejë atë vendim, i cili është kundër etikës”.
Emërimi i saj në një departament elitar në Komisionin Evropian shkaktoi një valë kritikash edhe para se të shpallej, duke përfshirë reagime të forta nga organizata të shumta joqeveritare.
Në fillim të majit, një grup organizatash të shoqërisë civile i shprehën në një letër të përbashkët Komisioneres për Mbrojtjen e Konkurrencës së Tregut, Margrethe Vestager, shqetësimin e tyre për emërimin e Scott Morton si Kryeekonomiste.
Ata paralajmëruan për konflikte të mundshme interesi në procesin e “pazakonshëm” të emërimit dhe opinionin e Scott Morton për zgjidhjen e problemit të përqendrimit të tepruar të fuqisë ekonomike. /tesheshi.com/
