Sali Berisha ka marrë në dorë frenat e Partisë Demokratike. Dje, Berisha priti në një takim të dërguarin e Asamblesë Parlamentare të OSBE-së, deputetin britanik Mark Pritchard si dhe disa zyrtarë të tjerë. Përmes një njoftimi në “Facebook”, Berisha njoftoi takimin me përfaqësuesin e OSBE duke dhënë detaje edhe mbi takimin. Ai tha se i njoftoi zyrtarët e OSBE me kolapsin në sistemin e drejtësisë nga ku nuk nguroi të cilësonte si shkaktarin kryesor të bllokimit të gjykatave kryeministrin Rama.
“Të dashur miq. Dje pata një takim me të dërguarin e Asamblesë Parlamentare të OSBE-së, deputetin Britanik Mark Pritchard, i cili shoqërohej nga ambasadori Andreas Nutele dhe Zv/Ambasadori i OSBE-së në Tiranë. Në këtë takim unë i njoha bashkëbiseduesit me kolapsin e plotë të qëllimshëm të sistemit të drejtësisë. Duke përdorur reformën për të shndërruar drejtësinë, sipas projektit orwollian të George Soros, degë të ekzekutivit të Edi Ramës, u asgjësuan Gjykata Kushtetuese, Gjykata e Lartë dhe së shpejti, do eliminohet edhe Gjykata e Apelit.
Të gjitha funksionet e Gjykatave të paralizuara i ka sot Edi Rama i cili, me kontrollin total të drejtësisë, ka bërë që 97% e të gjitha proceseve gjyqësore fitohen nga qeveria”, tha ai. Por pavarësisht këtij fakti ajo se çfarë bie në sy është se zyrtarët e BE kanë anashkaluar një takim me kreun demokrat Lulzim Basha. Kjo për faktin se para se të zhvillonin takimin me Berishën, ata u pritën në ambientet e Kryesisë së Kuvendit nga zëvendëskryetarja e Kuvendit të Shqipërisë, znj. Vasilika Hysi.
Sipas njoftimit të Kuvendit, gjatë takimit mes deputetes Hysi dhe zyrtarëve të OSBE u bisedua për kontributin e Kuvendit të Shqipërisë në proceset e integrimit europian, ecurinë e punës së komisionit parlamentar për reformën zgjedhore, trajtimin e rekomandimeve të OSBE/ODIHR-it, reformën në drejtësi si edhe ecurinë e procesit te vetingut. Bashkëbiseduesit nënvizuan se realizimi i këtyre reformave kërkon angazhimin jo vetëm të mazhorancës, por dhe të opozitës.
