Presidenti Ilir Meta ka reaguar në lidhje me situatën e krijuar për ndërtimin e Unazës së Re të Tiranës, e cila ka sjellë protesta nga banorët çdo ditë duke bllokuar rrugën. Në reagimin e Presidencës thuhet se Ilir Meta po ndjek me shqetësim dhe vëmendje situatën konfliktuale të krijuar në Tiranë mes qytetarëve dhe autoriteteve për shkak të ndërtimit të Unazës së Re.
“Presidenti Meta u bën thirrje të gjitha institucioneve të zbatojnë me përpikmëri procedurat ligjore për hartimin, miratimin dhe implementimin e këtij projekti urban në mënyrë që realizimi i tij të mundësojë një zgjidhjeje të drejtë për të gjithë qytetarët dhe interesin publik në tërësi. Presidenti Meta do t’i drejtohet institucioneve përgjegjëse për të marrë informacionin e duhur në lidhje me ndjekjen e procedurave të deritanishme për këtë çështje.
Të drejtat dhe liritë themelore të njeriut gëzojnë një mbrojtje të veçantë nga Kushtetuta e Republikës së Shqipërisë dhe të gjitha institucionet shtetërore duhet të tregojnë përgjegjshmëri në respektimin e plotë të tyre”, thuhet në reagim.
Kjo është hera e dytë kur Presidenti Ilir Meta del kundër qeverisë Rama. Pas “mosngopjes” me informacione për dekretin e Sandër Lleshit kërkon “mbingopje” me konfliktin te Astiri.
