Bajram Nelaj është pronari i ndërtesës pa leje që po prishet aktualisht në Laprakë për ti hapur rrugë ndërtimit të Unazës së Madhe dhe gjatë qeverisjes së Partisë Demokratike ka punuar në Agjencinë e Kthimit dhe Kompensimit të Pronave.
Për mediat ai deklaroi gjatë ditës së sotme se nuk mund të largohej prej saj se nuk kishte ku të linte fëmijët. Por e vërteta është krejt tjetër. Kjo pasi, as Bajrami dhe asnjë prej familjarëve të tij nuk jetonte në këtë ndërtesë.
Ai katin e parë të kësaj ndërtese dy katëshe e kishte dhënë me qira për farmaci bujqësore, ndërsa katin e dytë ia kishte dhënë me qira një grua, e cila është larguar prej saj ditët e fundit.
Jo vetëm, kaq, por Bajrami nuk rezulton të jetë aq hallexhi sa u përpoq të shfaqej sot para mediave, pasi ai zotëron edhe një restorant pranë Fakultetit të Inxhinierisë së Ndërtimit të cilin e ka përfituar në mënyrë të paqartë prej punës që ka bërë në Agjencinë e kthimit dhe Kompensimit të Pronave, megjithëse vet ai dhe asnjë prej familjarëve nuk ishte nga Tirana.
Bajrami e ka ndërtuar objektin në fjalë pa leje në vitin e mbrapsht 1997 dhe ka aplikuar për ta legalizuar në vitin 2005, kohë kur qeverisjen e morri Partia Demokratike.
Megjithëse ishte përfaqësues i kësaj force, ai nuk arriti dot që as gjatë 8 viteve të qeverisjes së PD-së dhe as më pas që ta legalizonte këtë ndërtesë të ndërtuar mbi një tokë të zaptuar në gjurmën e Unazës së Madhe.
Një fakt ky që tregon se që në kohën e PD-në nuk është lejuar që të legalizohet një objekt që ishte ngritur në gjurmën e Unazës.
